Sot, më 10 gusht 2025, shënohet 26-vjetori i rënies heroike të dëshmorit Rafet Isufi nga fshati Gjyryshec i Dardanës, luftëtar i Ushtrisë Çlirimtare të Kosovës dhe komandant skuadre në Zonën Operative të Karadakut.
I lindur më 10 nëntor 1964, Rafet Isufi u dallua që në moshë të re për guximin dhe përkushtimin ndaj çështjes kombëtare. Ai ishte pjesëmarrës aktiv në demonstratat e vitit 1981, duke u rreshtuar krah atyre që kërkonin liri e pavarësi për Kosovën.
Me fillimin e luftës së lavdishme të Ushtrisë Çlirimtare të Kosovës, Rafeti iu bashkua radhëve të saj, ku shërbeu me nder si komandant skuadre në ZOK, duke marrë pjesë në shumë beteja të rëndësishme për çlirimin e vendit.
Më 10 gusht 1999, vetëm pak javë pas çlirimit të Kosovës, Rafet Isufi ra dëshmor në një pritë të organizuar nga forcat serbe të mbështetura nga trupat ruse, duke vulosur me gjakun e tij rrugën drejt lirisë që ai e kishte ëndërruar.
Sot, bashkëluftëtarë, familjarë dhe qytetarë kujtojnë me nderim figurën e tij, duke theksuar se sakrifica e Rafetit mbetet një frymëzim i përhershëm për brezat që vijnë./GJILANI INFO/
