Në Gjilan janë zhvilluar Garat Rajonale të Ndihmës së Parë, ku morën pjesë ekipet e Kryqit të Kuq nga Gjilani, Artana (Novobërda) dhe Vitia.
Pas garave, vendin e parë e zuri ekipi nga Artana (Novobërda), duke siguruar kështu të drejtën për të përfaqësuar regjionin e Anamoravës në Garat Republikane të Ndihmës së Parë.
Komisioni për Garat Rajonale ishte i përbërë nga Dr. Esma Mustafa, kryetare e Degës së Kryqit të Kuq në Gjilan, Lulzim Mustafa, instruktor i Ndihmës së Parë nga dega e Novobërdës, Zaim Avdili, instruktor i Ndihmës së Parë nga dega e Vitisë, si dhe Anila Mustafa, instruktore e Ndihmës së Parë nga dega e Gjilanit.
Nga Kryqi i Kuq – Dega në Gjilan u vlerësua përkushtimi dhe puna e palodhur e të rinjve pjesëmarrës, si dhe mbështetja e vazhdueshme e instruktorëve dhe komisionit gjatë përgatitjeve dhe zhvillimit të garave.
Ekipit fitues i është uruar suksese në Garat Republikane të Ndihmës së Parë, ndërsa është shprehur falënderim për të gjithë ata që kontribuuan dhe mbështetën këtë aktivitet./Gjilani INFO/
