Drejtoria Rajonale e Policisë në Gjilan ka shtuar aktivitetet operative dhe parandaluese në gjithë rajonin në kuadër të Planit Operativ “Vera 2026”, me qëllim rritjen e sigurisë publike, parandalimin e aksidenteve në trafik dhe luftimin e kriminalitetit.
Drejtoria Rajonale e Policisë në Gjilan, përmes stacioneve policore dhe njësive të specializuara rajonale, po zhvillon aktivitete të shtuara operative dhe parandaluese në të gjithë zonën e përgjegjësisë në kuadër të Planit Operativ “Vera 2026”.
Sipas Policisë, fokusi i këtyre aktiviteteve është rritja e prezencës së patrullave në terren, mbikëqyrja dhe kontrolli i trafikut rrugor, parandalimi i aksidenteve si dhe ndërmarrja e masave ndaj shkelësve të ligjit.
Po ashtu, rëndësi e veçantë po i kushtohet luftimit të dukurive kriminale që lidhen me narkotikët, përmes veprimeve operative dhe hetimore, identifikimit të personave të përfshirë dhe lokalizimit të vendeve të dyshuara.
Policia e Gjilanit thekson se mbetet e përkushtuar për të garantuar një ambient sa më të sigurt gjatë sezonit veror, duke bashkëpunuar ngushtë me qytetarët dhe institucionet përkatëse.
Në fund, Drejtoria Rajonale e Policisë u bën thirrje të gjithë qytetarëve që të respektojnë ligjin dhe të bashkëpunojnë me zyrtarët policorë, në mënyrë që siguria të jetë në nivel sa më të lartë gjatë muajve të verës./Gjilani INFO/
