Zëvendësministri i Mbrojtjes, Shemsi Syla, tha se me vite të tëra forcat ushtarake serb janë të dislokuara pranë kufirit me Kosovën me synim destabilzimin e situatës.
Sipas tij, vendosja e 48 baza e tri brigada më të rëndësishme të ushtrisë së Serbisë paraqet rrezik për sovranitetit e Kosovës e njëkohësisht është edhe rrezik më i gjerë rajonal e global.
Syla shtoi se vazhdimisht janë në koordinuar me KFOR-in, që nëse u duhet ndihmë, Forca e Sigurisë së Kosovës (FSK), do të jetë e gatshëm që në bazë të Kushtetutës ta mbroj çdo cep të Kosovës në rast se ajo sulmohet nga ushtri të jashtme.
“Ne jemi në bashkëpunim të përhershëm me KFOR-in, jemi në mbështetje të tij, kurdo që KFOR-i ka nevojë që forcat tona të jenë ndihmë ne do të jemi të gatshëm. Ne në bazë të Kushtetutës e mbrojmë çdo cep të Kosovës në rast se ajo sulmohet nga ushtri të jashtme ose agresion ndaj vendit tonë. Me analizë të situatave jemi të gatshëm që ta ndihmojmë nëse eventualisht ka nevojë që ne të reagojmë. Lajmi për ushtrinë serbe nuk është i ri, me vite të tëra forcat ushtarake serb me vite janë të dislokuara me vite pranë kufirit dhe jo më pak se 48 baza e tri brigada më të rëndësishme janë të orientuara drejt jugut të Serbisë gjegjësisht afër kufirit tonë”.
“Ne gjithnjë e kemi ngritur këtë rrezik, e kemi bërë publike se këto forca ndërsa ky dislokim ose përqendrim që është bërë rreth kufirit paraqet rrezik rreth sovranitetit tonë e njëkohësisht edhe më të gjerë rajonal e global. Kështu që shqetësimin ynë është me bazë dhe besoj që faktori ndërkombëtar është duke e trajtuar seriozisht këtë punë e që edhe e ka ngritur zërin kundër kësaj dukurie dhe sigurisht që paraqet rrezik permanent e që ne duhet të jemi vigjinet ndaj kësaj situate duke u përgatitur evtualsiht meqë ne e dimë që NATO e ka mandatin e sigurisë dhe mbrojtës së kufirit tonë, dhe bashkërisht i ndajmë informacionet tona e ndjejmë këtë atmosferë të cilën po e krijon Serbia me prezencën ushtarake afër kufirit tonë”.
Tutje, Syla tha se janë pajisur me armë moderne të prodhuara në shtete të NATO-s e që plotësojnë standartet e kërkuar. E gjithë faza e zhvillim e transformimit, tha si po zhvillohet në koordinim të plotë me partnerët.
“Kemi marrë pajisje cilat janë adekuate për fazat e zhvillimit, armë moderne të cilat janë në trendin botëror dhe të cilat e dërgojnë në fund projektet për zhvillimin normal për partneritetin me shtetet tjera, partnere të cilat i bëjnë zhvillimin ushtarak, forcat të cilat sot garojnë me zhvillim modern, është që edhe ato pajisje që i marrim janë të prodhuara në shtetet e NATO-s dhe të gjitha plotësojnë standardet e saj”.
Ai ka deklaruar se 2023-ta ishte një vit i suksesshëm për Forcat e Sigurisë së Kosovës, duke thënë se kanë realizuar një numër të madh objektivash. Syla tha se fondi prej 40 milionë eurosh ishte një kontribut i jashtëzakonshëm i fundvitit duke thënë se do t’i lehtësojë planet e zhvillimit.
“Vërtetë ne po e përmbyllim një vit shumë të rëndësishëm me suksese në siguri pasi patëm edhe një buxhet i cili na mundësoi që projektet tona të realizohen, njëkohësisht edhe të shtohen kapacitet tona me të cilat ne do t’i realizonim objektivat tona. Ky buxhet ishte edhe synim i mëparshëm sepse zhvillimi i përgjithshëm i sistemit e objektivave tona asesi nuk mund të realizohej pa mjete. Fal përkushtimit të Qeverisë ose prioriteteve që i ka dhënë fushës së sigurisë ne kemi arrit të plotësojmë një numër të madh të objektivave tona drejt realizimit të synimeve si pajisjet më moderne të cilat janë më të domosdoshme për forcën tonë si shkollimin, trajnimin e zhvillimin e fazave tranzitore”.
“Objektivi jonë ishte që ta arrijmë t’i sigurojmë pajisjet dhe ato nuk bëhen pa mjete, para dhe ky shtim i fundvitit na është bërë jo vetëm si lajm i mirë, por edhe një kontribut i jashtëzakonshëm për realizimin e atyre objektivave. Ne këto mjete lehtësisht kemi mundur t’i kanalizojmë meqenëse kemi planin e zhvillimit afatshkurtër- mesëm dhe atë afatgjatë dhe këtë javë duke përfunduar kontratat e fundit për të realizuar dhe shfrytëzuar mjetet të cilat na janë ndarë”./EO/
