Dy vozitës të automjeteve BMW X5, njëri me ngjyrë të kuqe dhe tjetri me ngjyrë të zezë, janë kapur duke kryer kundërvajtje të rënda në trafik, të evidentuara përmes kamerave të sigurisë të vendosura në qytet.
Sipas autoriteteve, njëri nga vozitësit ka lëvizur në shiritin e kundërt të qarkullimit dhe nuk është ndalur në dritën e kuqe të semaforit, ndërsa vozitësi tjetër ka kryer tejkalim në vijë të plotë, pranë vendkalimit për këmbësorë afër rrethrrotullimit, duke rrezikuar seriozisht pjesëmarrësit e tjerë në trafik.
Njësiti Rajonal i Komunikacionit Rrugor në Gjilan ka reaguar menjëherë pas identifikimit të rasteve, duke lokalizuar vozitësit dhe shqiptuar gjobat përkatëse në përputhje me Ligjin Nr. 08/L-186 për Rregullat e Trafikut Rrugor.
Drejtoria Rajonale e Policisë në Gjilan u ka bërë thirrje të gjithë ngasësve që të respektojnë rregullat e trafikut, të përshtatin shpejtësinë me kushtet e rrugës dhe të kontribuojnë në rritjen e sigurisë rrugore.
“Siguria në trafik është përgjegjësi e përbashkët dhe kërkon angazhimin e të gjithëve,” thuhet në apelin e policisë/Gjilani INFO/
