Melihate Tërmkolli nga Lidhja Demokratike e Kosovës ka reaguar pas fillimit të gjykimit në Hagë të krerëve të Ushtrisë Çlirimtare të Kosovës (UÇK).
Tërmkolli ka thënë se po të ishte gjallë Ibrahim Rugova do të dërgonte letër në Gjykatën Speciale në mbrojtje të luftës së UÇK-së dhe popullit të Kosovës dhe se do të uronte pafajësinë e të gjithë të akuzuarave.
Ajo ka kritikuar presidenten Vjosa Osmani dhe kryeministrin Albin Kurti që s’e kanë thënë asnjë fjalë.
Tërmkolli ka shkruar në “Facebook” se Osmani është duke u marrë me plotësim të stafit, ndërsa Kurti me “Zajednicën”.
“Po të ishte presidenti Rugova, e pakta që do të bënte dje, ai do të niste një letër Gjykatës Speciale në mbrojtje të luftës së UҪK-së dhe popullit të Kosovës për çlirim nga okupatori gjenocidal serb dhe do të uronte pafajësinë e të gjithë të akuzuarve. Burrështetasi e patrioti i vërtetë, në rend të parë vë interesin e shtetit! Asnjë fjalë nga presidentja, tani! Asnjë fjalë nga kryeministri, tani! Ku po jetojnë përfaqësuesit më të lartë të Kosovës, në çfarë planeti janë?! Presidentja u mor me plotësimin e ‘stafit’ të saj, ndërsa kryeministri dhe ndihmësit e tij me ‘Zajedenicën’! Turpi ka emër e mbiemër! Dhe jo vetëm turpi!”, ka shkruar Tërmokolli.
