Qeveria e Serbisë po i bllokon fondet që Qeveria e Kosovës dhe ajo e Shqipërisë i kanë ndarë për shqiptarët e Luginës së Preshevës. Këtë shqetësim e ka ndarë kryetari i Këshillit Kombëtar Shqiptar në Luginën e Preshevës, Enkel Rexhepi, i cili tha se me mosekzekutimin e këtyre fondeve, po sfidohet identiteti nacional në Luginë.
“Banka i ka pranuar këto fonde, i kemi nënshkruar, por më pas Qeveria e Serbisë i ka kthyer pas. Qeveria e Serbisë po i bllokon fondet e Kosovës dhe të Shqipërisë që janë destinacion për Luginën e Preshevës”, ka deklaruar Rexhepi.
Ai ka bërë të ditur se KKSH ka njoftuar faktorët ndërkombëtarë, organizatat relevante dhe Komisionerin për Barazi lidhur me bllokimin e transfereve dhe donacioneve, të cilat sipas tij kanë për qëllim zhvillimin dhe ruajtjen e identitetit kombëtar në Luginë.
Rexhepi ka theksuar se nuk bëhet fjalë për një çështje teknike, por për një vendim politik që prek drejtpërdrejt mijëra qytetarë.
“Nuk bëhet fjalë për një çështje teknike. Bëhet fjalë për bllokimin e fondeve nga Qeveria e Kosovës që prekin drejtpërdrejt 3,650 nxënës, 94 fëmijë pa prind, 957 bujq, mbi 756 studentë, 139 organizata joqeveritare dhe mijëra qytetarë që varen nga këto programe”, ka thënë ai.
Sipas tij, ky veprim nuk paraqet vetëm bllokim fondesh, por “bllokim të zhvillimit, arsimit dhe mbështetjes për shqiptarët në Luginën e Preshevës dhe Sanxhakut”.
Rexhepi ka akuzuar Qeverinë e Serbisë dhe ministrin për Pakica, Demo Berisha që po veprojnë përmes bankave, duke i bllokuar fondet.
“Ky është diskriminim i hapur dhe si i tillë duhet të trajtohet nga të gjithë, pa përjashtim. Ne nuk do të ndalemi. Do të vazhdojmë me çdo mjet demokratik, institucional dhe ndërkombëtar”, ka përfunduar Rexhepi.
Kujtojmë se Qeveria e Kosovës, në mbledhjen e mbajtur më 03.04.2026, ka miratuar vendimin për ndarjen e mjeteve financiare për Luginën e Preshevës. Kryeministri Albin Kurti ka hënë se ky vendim përfaqëson angazhimin e qëndrueshëm të Republikës së Kosovës për mbështetjen e shqiptarëve në Luginën e Preshevës.
“Ky vendim përfaqëson angazhimin e qëndrueshëm të Republikës së Kosovës për mbështetjen e shqiptarëve në Luginën e Preshevës përmes një pakete konkrete që adreson nevojat jetike të qytetarëve atje. Ky nuk është vetëm një vendim, por një përgjegjësi shtetërore”, ka thënë Kurt.
Qeveria kishte planifikuar që për këtë vit të ndante 4 milionë euro për Luginën e Preshevës dhe Sanxhakun.
