Deputeti shqiptar në Parlamentin e Serbisë, Shaip Kamberi ka zhvilluar një takim me ambasadorin e Finlandës në Gjermani, Kai Sauer, në kuadër të një vizite zyrtare në Berlin.
Takimi vjen në një kohë kur Finlanda pritet të marrë kryesimin e radhës së OSBE-së, një organizatë kyçe për të drejtat e njeriut dhe monitorimin e situatës në rajon.
Kamberi theksoi rëndësinë e këtij takimi për të artikuluar nevojën për angazhim më të madh ndërkombëtar në Luginën e Preshevës.
“Në takimin e parë sot në Berlin, vizituam Ambasadorin e Finlandës Kai Sauer. Një njohës i mirë i rajonit, meqë Ambasadori Sauer ishte pjesë e ekipit të Presidentit Ahtisari në procesin e dialogut për Kosovën”, ka shkruar Kamberi.
Në takim, Kamberi kërkoi që OSBE-ja të ketë një vëmendje të shtuar ndaj gjendjes në Luginë, duke e vënë theksin tek shkeljet e të drejtave të shqiptarëve në këtë rajon.
“Meqë Finlanda do të jetë kryesuese e radhës së OSBE-së, shtruam nevojën e vëmendjes së shtuar të OSBE-së për Luginën e Preshevës”, tha ai.
Ai gjithashtu e falënderoi ambasadorin Sauer për pritjen dhe përkrahjen që ka shprehur ndaj kërkesave të komunitetit shqiptar në jug të Serbisë.
“Falënderojmë Ambasadorin Sauer për mikpritjen e përzemërt dhe përkrahjen për betejën tonë për të drejtat tona të cenuara”, shkroi Kamberi.
