Diaspora shënon rekord me remitencat
Remitencat nga mërgimtarët shqiptarë në diasporë për nëntë muaj kanë tejkaluar vlerën e 1 miliard eurove në Kosovë, shkruan albinfo.ch.
Remitencat nga diaspora kanë qenë përherë një ndihmë e madhe për ekonominë e Kosovës.
Mirëpo viti 2023 duket se ka shënuar rekord të këtyre remitencave, sipas raportit të fundit nga Banka Qendrore e Kosovës (BQK).
Referuar BQK-së, kjo paraqet një rritje prej 12 për qind krahasuar me periudhën e njëjtë të vitit të kaluar.
“Një miliard e 12.6 milionë euro është vlera e remitencave deri në muajin shtator, gjë që paraqet rritje prej 11 për qind krahasuar me periudhën e njëjtë të vitit 2022”, thuhet në njoftimin e BQK-së.
Duket se prurjet më të mëdha të remitencave ishin nga institucionet financiare jo-bankare me pjesëmarrje prej 57.4%, pasuar nga kanalet tjera me 24.4% dhe bankat me 18.2%.
BQK-ja tregon se 70% e dërgesave të mërgatës vijnë nga vendet e Bashkimit Evropian, ku Gjermania ka pjesëmarrje me 38.1%, ndjekur nga Zvicra me 17.6% dhe SHBA-ja me 7.5%.
Për sa u përket aseteve të kompanive të sigurimit, deri në muajin shtator thuhet se vlera e tyre ishte 298.1 milionë euro. Ndërsa, asetet e fondeve pensionale kanë arritur vlerën e 2.62 miliardë eurove.
Prej tyre duhet theksuar se:
- 1.013 miliard euro, vlera e remitencave
- 298.1 milionë euro, asetet e kompanive të sigurimit
- 2.62 miliardë euro, asetet e fondeve pensionale
- 479 milionë euro, asetet e ndërmjetësve tjerë financiar
Në fund, BQK-ja tregon se asetet e ndërmjetësve të tjerë financiarë në fund të muajit shtator 2023 janë rritur për 3.1 milionë euro, krahasuar me muajin paraprak duke arritur vlerën e 479 milionë eurove.
