Sezoni i korrje-shirjeve ka nisur në mbarë Kosovën, duke shënuar fillimin e një prej proceseve më të rëndësishme për sektorin e bujqësisë. Të dhënat nga terreni flasin për një vit premtues, me rendimente më të larta dhe grurë me cilësi të mirë.
Në shumë zona të vendit, kombajnat tashmë kanë hyrë në ara, ku po mblidhet fryti i një viti pune dhe përkushtimi të fermerëve. Prodhimi i grurit po grumbullohet për magazinim, me pritjet që ai të plotësojë nevojat e tregut dhe të kontribuojë në furnizimin e qëndrueshëm me këtë kulturë strategjike.
Fermerët shprehen optimistë se këtë vit do të sigurojnë sasi më të mëdha gruri sesa në sezonet e kaluara. Sipas tyre, kushtet e favorshme klimatike, përdorimi i mekanizimit modern dhe zbatimi i praktikave bashkëkohore bujqësore kanë ndikuar drejtpërdrejt në rritjen e prodhimit.
Edhe njohësit e bujqësisë vlerësojnë se profesionalizmi në punimin e tokës, përzgjedhja e farës cilësore dhe kujdesi gjatë gjithë ciklit të kultivimit kanë dhënë rezultate inkurajuese.
Nëse pritjet e fermerëve realizohen, ky mund të jetë një nga sezonet më të suksesshme të korrje-shirjeve në vitet e fundit, duke forcuar prodhimin vendor dhe sigurinë ushqimore në vend./Gjilani INFO/
