Të vështirë e historik mbi të gjitha, Gregory Kehoe, avokati kryesor i presidentit Hashim Thaçi, e sheh procesin gjyqësor që po zhvillohet ndaj tij, Kadri Veselit, Rexhep Selimit e Jakup Krasniqit në Dhomat e Specializuara të Kosovës me seli në Hagë.
Megjithëse është optimist se klientin e tij president do ta nxjerrë shpejt të lirë, para se t’i vijë radha vetë Kehoes e mbrojtësve tjerë ta paraqesin mbrojtjen e provat e tyre në gjykatore.
“Mendoj se do të përpiqem ta nxjerrë presidentin sapo Prokuroria ta përfundojë paraqitjen e provave dhe shpresoj ta fitoj mocionin që të mos kemi çfarë të përgjigjemi, deri tashti nuk shoh ndonjë fuqi në provat që ka Prokuroria e që lidhen me presidentin Thaçi. Por nëse na duhet të vazhdojmë me mbrojtjen, do ta paraqesim rastin megjithëse e vështirë të flitet në këtë fazë. Po përmbahem sepse nëse ju jap një afat kohor, vërtetë që nuk e di se çfarë do të sjellë prokuroria që të përgjigjem por nëse do të jemi të detyruar të paraqesim provat tona, kemi një valë të dëshmitarëve ndërkombëtar që do të flasin për presidentin Thaçi, do të dëshmojnë për faktin se presidenti Thaçi, veçanërisht pas luftës, është përpjekur të sjellë paqe dhe pajtim në Kosovë, personi që është përpjekur ti bind serbët të mos largohen, dikush që shtynte përpara idenë e një shoqërie multietnike, dikush që udhëtonte drejt vendeve të ndryshme në kohë të ndryshme që të përpiqej të mënjanonte ndonjë përshkallëzim potencial dhe tërë këto veçse janë dokumentuar nëpër media përmes videove dhe shkrimeve, pra ai ka qenë personi që i ka bërë gjithë këto vetëm pak ditë pas luftës. E sa kohë do të na marrë neve ta paraqesim gjithë këtë skenar, shpresoj të marr pak ndihmë nga mediat që mund të hulumtojnë pak për ne. Dhe jo vetëm mediat kosovare por media nga mbarë bota, mediat që e kanë përcjellë dhe mbuluar ngjarjet e luftës gjatë 98-së dhe 99-ës.”
Në një intervistë me gazetarë të Klan Kosova, Nacionale e RTK, nga Haga, Kehoe ka treguar se si kanë qenë 3 vjet në paraburgim për Hashim Thaçin teksa priste nisjen e vonuar të gjykimit.
“Mendoj se ka qenë shumë e vështirë për presidentin, siç thatë ai po mbahet tash e tri vjet dhe ka qenë në masën e paraburgim gjatë gjithë kësaj periudhe, vazhdimisht jemi përpjekur ta nxjerrim jashtë por nuk kemi pasur sukses në atë drejtim. Nuk mendoj se ka ndonjë arsye që ai të vazhdojë të qëndrojë në paraburgim, natyrisht ai duhet të jetë në mbajtje ndërkohë që ka gjykim por ka mangësi sa i përket orarit të Gjykatës, për shembull në raste festash ai sigurisht mund të lirohet.”
“Pra në rrafshin personal për të ka qenë shumë e vështirë, ai po mbahet, ka kurajë dhe më duhet ta them siç po bëjnë edhe tre zotërinjtë tjerë por ka qenë e vështirë sepse gjykimi është zhvilluar ngadalë e do të vazhdojë të jetë proces i ngadalshëm. Prokuroria ka goxha dëshmitarë dhe mendoj se do të marrë ca kohë. Por do t’ua them edhe këtë, do të vazhdojmë të përpiqemi ta lirojmë nga paraburgimi gjatë muajve në vijim dhe do t’ju njoftoj si do të shkojë.” – shton tutje Kehoe.
