Deputeti holandez në Parlamentin Evropian, Thujs Reuten, ka shprehur pakënaqësi me pozitën e bllokut evropian karshi qëndrimeve të Serbisë.
Teksa komentoi marrëveshjen Kosovë-Serbi, eurodeputeti tha se kjo do t’ia sigurojë vendit njohjen nga Serbia.
“Është e qartë se marrëveshja ne te ardhmen të qon tek njohja e pavarësisë së Kosovës nga Serbia por tani është momenti që të dyja palët të fillojnë me zbatimin e marrëveshjeve të arritura. Për Kosovën veçanërisht nuk ishte e lehtë që të pajtohet me ato pika të marrëveshjes, por tregoi gatishmëri për kompromise me Serbinë”, u shpreh ai.
Tutje, Reuten theksoi se nuk do të ketë një Republikë Serbe brenda Kosovës.
“Ekziston tashmë një Republike Serbe në Ballkan dhe kjo është shumë madje. Nuk do të lejohet edhe një Republike Serbe brenda Kosovës, prandaj të mos krijohet mjegull në opinion me artikullin e 7-të të marrëveshjes, ku bëhet fjalë për diçka tjetër. Ajo histori nuk do të përsëritet më. Kosova nuk e ka për obligim të krijoj diçka që përbën rrezik për sovranitetin e saj”, shtoi eurodeputeti holandez, raporton tëvë1.
Krejt në fund, Reuten u bëri thirrje pesë shteteve skeptike të Bashkimit Evropian që ta njohin pavarësinë e Kosovës.
