Skuadra gjilanase, FC Drita, në momentet e fundit ia ka arritur ta shkëpus një pikë, në ballafaqimin që pati me Prishtinën, ndeshje kjo e javës së 20-të e Albi Mall Superligës së Kosovës në futboll.
Ky derbi i luajtur në stadiumin “Fadil Vokrri”, solli emocione të papërshkrueshme për të dyja taborët, pasi u shënuan plotë gjashtë gola.
Ishin vendësit që përmbyllën pjesëlojën e parë me epërsi 2:0, me golat e Leotrim Kryeziut (25’) dhe Diar Halilit (35’), dhe kur u duk se për vendësit po shkonte takimi “vaj” e për mysafirët, si më keq, Drita ia arrin që ta zvogëlojë rezultatin përmes Besnik Krasniqit (61’), për të mbetur në lojë.
Por, sërish vendësit shënojnë përmes Drilon Islamit (76’) për të paralajmëruar se megjithatë pikët e plota do të mbesin në Prishtinë.
Por, të paqartë sërish e bëri situatën goli i dytë i Dritës, përmes Albert Dabiqaj (78’), për t’i dhënë sërish shpresë skuadrës bardh e kaltër nga Gjilani.
Dhe, kjo shpresë edhe u konkretizua, anise pothuajse në sekondat e fundit të takimit (90+5’), pasi ishte Rron Broja ai i cili tundi rrjetën kundërshtare për t’i barazuar shifrat.
Fishkëllima e fundit e gjyqtarit, ishte tregues se ky derbi i zjarrtë mbeti pa fitues, por me shifrat 3:3, ekipet morën nga një pikë.
FC Drita vazhdon të jetë liderë e tabelës së klasifikimit, ku nga këto 20 xhiro ka të grumbulluara 44 pikë.
