Kamenica për dy ditë me radhë u shndërrua në qendrën e volejbollit në rërë, duke mirëpritur një turne të Beach Volley që solli emocione, rivalitet sportiv dhe një atmosferë të jashtëzakonshme për sportdashësit.
Gjatë këtij eventi, garat u zhvilluan në kategorinë e vajzave dhe djemve, ku ekipet pjesëmarrëse dhuruan ndeshje të luftuara, me nivel të lartë loje dhe shumë momente emocionuese që mbajtën publikun të angazhuar deri në pikën e fundit.
Tribunat u mbushën me qytetarë dhe adhurues të sportit, të cilët me brohoritjet dhe mbështetjen e tyre krijuan një atmosferë festive, duke e bërë këtë aktivitet një nga ngjarjet më të bukura sportive të verës në Kamenicë.
Pas dy ditësh plot konkurrencë, energji dhe argëtim, fitueset në kategorinë e vajzave u shpallën Lyra Pireva dhe Xhyda Krruti, ndërsa në konkurrencën e djemve triumfuan Ermal Maliqi dhe Erion Bajrami, të cilët u shpërblyen për paraqitjet e tyre të shkëlqyera.
Ky turne dëshmoi edhe një herë se Beach Volley po fiton gjithnjë e më shumë popullaritet, ndërsa Kamenica po shndërrohet në një destinacion të rëndësishëm për organizimin e aktiviteteve sportive që mbledhin të rinjtë dhe promovojnë frymën e garës së ndershme./Gjilani INFO/
