Në ambientet e Drejtorisë Rajonale të Policisë së Kosovës në Gjilan është zhvilluar një takim pune me përfaqësuesit e Sektorëve Rajonalë të Hetimeve nga të gjitha drejtoritë rajonale të Policisë së Kosovës.
Takimi u zhvillua nën udhëheqjen e zëvendësdrejtorit të Drejtorisë Rajonale të Policisë në Gjilan, nënkolonel Remzi Azemi, ndërsa në fokus ishte forcimi i bashkëpunimit dhe koordinimit ndërmjet strukturave rajonale të hetimeve.
Gjatë takimit u diskutua për shkëmbimin e informatave relevante, përvojave dhe praktikave profesionale, si dhe për bashkërendimin e veprimeve operative dhe hetimore.
Vëmendje e veçantë iu kushtua rritjes së efikasitetit në fushën e hetimeve dhe rezultateve në luftimin dhe parandalimin e kriminalitetit, me theks të veçantë në veprat penale kundër pasurisë.
Pjesëmarrësit vlerësuan se bashkëpunimi i drejtpërdrejtë ndërmjet sektorëve rajonalë të hetimeve, komunikimi i vazhdueshëm dhe shkëmbimi i përvojave profesionale janë të rëndësishme për rritjen e efikasitetit të punës policore dhe ofrimin e një shërbimi sa më profesional në interes të sigurisë së qytetarëve./Gjilani INFO/
