Daniela Malo është Presidente e Asosacionit Helen të Menaxhimit Farmaceutik
Daniela Malo është shqiptarja, e cila së fundmi është përzgjedhur presidente e Asosacionit Helen të Menaxhimit Farmaceutik, përcjell albinfo.ch.
Ajo ka përfunduar studimet pasuniversitare për Marketing dhe Komunikim në Universitetin e mirënjohur të Athinës për Ekonomi dhe Biznes (ASOEE).
Daniela jeton në Greqi që nga viti 1993 dhe ka një karrierë shumëvjeçare në pozicione drejtuese në sektorët e marketingut dhe shitjeve, në kompaninë prestigjioze dhe më të madhe farmaceutike, kërkim-zhvillimit pranë Institutit të Kërkimeve të Eksportit në Selanik.
Ajo është anëtare e Akademisë Helene të Marketingut, anëtare e Komitetit të Publicitetit dhe Komunikimit të Asosacionit Helen të Industrisë së Kujdesit Shëndetësor të Klientëve.
Daniela Malo është në dukje një vajzë e zakonshme, por me një vullnet të jashtëzakonshëm, që nuk i lë asgjë në dorë rastësisë. Tashmë Presidente e votuar e Asosacionit Helen të Menaxhimit Farmaceutik, pas një karriere shumëvjeçare në krye të pozicioneve drejtuese në sektorët e marketingut dhe shitjeve, në kompaninë prestigjioze dhe me te madhe farmaceutike, Daniela gëzon jo vetëm vlerësimin e bashkëpunëtorëve të saj, por shquhet për rezultatet reformuese me ndikim të drejtpërdrejtë në imazhin e organizmave ku vepron.
Selaniku ishte qyteti i parë grek që do ta njihte dhe do ta përqafonte vajzën e vogël korçare, ndërsa Kastoria do t’i jepte formimin në shkencën e Tregtisë Ndërkombëtare, duke i hapur dyert e punësimit në fushën e kërkim-zhvillimit pranë Institutit të Kërkimeve të Eksportit në Selanik. Kush e ka në gjen punën, nuk mjaftohet me pak. Kështu Daniela e re konkurroi mes qindra studentëve dhe fitoi e para bursën e Fondacionit Helen të Bursave (IKY) për të ndjekur pasuniversitarin për Marketing dhe Komunikim në Universitetin e mirënjohur të Athinës për Ekonomi dhe Biznes (ASOEE).
Një studente e palodhur spikat përherë dhe kur kjo kombinohet me një trup motivuese akademike, arritjet e ardhshme janë çështje kohe. Daniela tregon me krenari se si studente dhe pjesë e ekipit të profesorit të shquar dhe të paharruar, z. Avloniti, dera e Athinës u hap lehtë dhe prej asaj kohe rruga e saj është vetëm një ngjitje… nga menaxhere kërkim-zhvillimi në… ekipin udhëheqës. Tashmë me një listë të gjatë suksesesh profesionale dhe organizimesh të eventeve kombëtare dhe ndërkombëtare, Daniela është shpesh e ftuar si folëse kryesore në një sërë kongresesh të rëndësishme dhe universitete publike e private për të motivuar më të rinjtë. Pjesë e një sërë komisionesh vlerësimi të çmimeve të ekselencës, anëtare e Akademisë Helene të Marketingut, anëtare e Komitetit të Publicitetit dhe Komunikimit të Asosacionit Helen të Industrisë së Kujdesit Shëndetësor të Klientëve, ajo me meritë të plotë mori shumicën e votave për pozicionin e Presidentes së Asosacionit Helen të Menaxhimit Farmaceutik.
Në fshatin Dhipotam të Kosturit, në vitin 1993, mbërriti pas një marshimi të gjatë nëpër male me gjyshin e saj, një vajzë e vogël mirënjohëse korçare, e cila 10 vjet më vonë do të rikthehej në këtë fshat për t’u dhënë mësim nxënësve të tij, në gjuhën angleze. Që prej atij viti jeta e saj do të ishte një maratonë studimesh dhe kualifikimesh të pandërprera deri më sot, krahas punës dhe familjes së bukur me dy fëmijët e saj. Krenare për origjinën dhe rrugëtimin, bijë e dy prindërve të palodhur dhe atdhedashës dhe, siç thote vetë, duke marrë shumë frymëzim nga i ati për të qenë gjithnjë e para, Daniela Malo është shembulli i një suksesi të ngritur mbi dashurinë për dijen dhe punën, me tiparet më të mira nga të dy vendet dhe duke rrezatuar vetëm pozitivitet.
