Bashkësia Islame e Kosovës ka njoftuar se muaji i madhëruar Ramazan përfundon të enjten, më 20 prill 2023, ndërkaq dita e parë e festës së Fitër – Bajramit është të premten, më 21 prill.
Në njoftimin e BIK-ut bëhet me dije se manifestimi qendror për festën e Fitër – Bajramit për Republikën e Kosovës mbahet në Xhaminë e Madhe në Prishtinë.
Namazi i Fitër – Bajramit falet në orën 06:23, të cilit do t’i prijë kryeimami i Bashkësisë Islame të Kosovës, Vedat Sahiti.
Hytben e Fitër – Bajramit do ta mbajë myftiu i Kosovës, Naim Tërnava, i cili do t’i drejtohet opinionit të gjerë me mesazhin e kësaj feste.
“Kryesia e Bashkësisë Islame të Kosovës ua uron festën e Fitër – Bajramit të gjithë besimtarëve dhe opinionit të gjerë, duke e lutur Zotin që t’i ketë pranuar agjërimin, lutjet dhe ibadetet tona. Me fat festa e Fitër – Bajramit!”, thuhet në njoftimin e BIK-ut.
