Ahmet Selmani
(Rendja e Ali Podrimjes)
Ali Podrimja
ty të mori lumi yt
e të shpuri në parajsë
me gjithë ëndrrat
e bardha
me gjithë dhembjet
e verdha
me gjithë pikëllimin
e zi
me gjithë mallin
e trëndafiltë
ndërsa unë
mbeta me këmbë të kredhura
në rubikonin e jetës
duke të pritur
të ma zgjasësh dorën
në breg
e të ecnim duke folur
për poezinë
për atdheun
pa e ditur se ti
më kishe lënë diçka
në fushat e kujtesës
si lule malli
a si zot fjale
nuk e di pse tani
çdo ditë të shoh duke rendur
si hije e gjallë
më shpejt se kali i vdekjes
më shpejt se Kostandini
nëpër udhët
e Arbnisë.
