Shkelzen Halimi
Ambienti ynë letrar
Ambienti ynë letrar fatkeqësisht po përshkohet me lloj-lloj absurde të natyrave të ndryshme. Se kemi zhvendosje të vlerave, kjo më nuk paraqet asnjë risi, por se dalë ngadalë po bëhemi “popull” poetik, kjo tashmë është e sigurt. Ata që i përcjellin rrjedhat, të themi kushtimisht, letrare, kanë vërejtur se si po vërshojnë “poetët” nga të gjitha anët. Në këtë vërshim më nuk ka asnjë mburojë, nuk respektohet asnjë kriter. Motoja e tyre është thjeshtë: shkruaj, shfrytëzo rrjetet sociale dhe brenda natës “faktorizohesh”. Çdo mëhallë ka manifestimin e vet letrar, ka antologjinë e vet, ka “kritikët” e vet, ka shtypshkronjën vet, ka shtëpinë e vet botuese, ka… Aq shumë abuzohet me letërsinë, sa që po shndërrohet në një dukuri normale, pa të cilën sikur nuk mund të jetojmë.
Është e habitshme, por aspak e çuditshme se si anonimëve brenda natës u hapen “portat” e suksesit dhe depërtojnë atje ku vërtet nuk e kanë vendin dhe ku thjeshtë realisht e turpërojnë letërsinë shqiptare. Si është e mundur që disa anonimë në hapësirat shqiptare të gjejnë shteg dhe të botojnë libra në Francë e Angli, të prezantohen nëpër revista të ndryshme të huaja. Ndonëse matrapazë ka edhe në shtetet perëndimore, megjithatë dëmi i shkaktuar i atribuohet letërsisë sonë, e cila në një mënyrë është bërë se thes që përdoret për stërvitje të boksierëve.
Mungesa e një rendi të mirëfilltë, mungesa e kritikës, e debatit, ka bërë që të shpërthejnë sythët e “shkrimtarëve” anonimë, të cilëve u është bërë mendja top se çka do që ata shkruajnë, është vlerë artistike. Janë po këta që hapin e mbyllin konkurse, ashtu siç u do qejfi, paraprakisht duke i bëri llogaritë se kujt do t’ia ndajnë çmimet, kuptohet gjithnjë me logjikën e profitit dhe sipas parimit: UNË JAP – TI JEP (veta e tretë rrezikon pazarin). Dhe ndodh që një “autor” t’i rrëmbejë të gjitha shpërblimet. Por, në këtë të keqe, ndonjëherë paraqitet ana tjetër e medaljes, sepse, siç thonë, gënjeshtra i ka këmbët e shkurta dhe në fund të ditës del lakuriq e vërteta e pazarit të autorëve të këtyre matrapazllëqeve. Absurdet në ambientin tonë letrar nuk përfundojnë…/GJILANI INFO/
