Avni Halimi
Amza e çdo identiteti kombëtar është hambari i të mirave shpirtërore dhe materiale, respektivisht, thesari i trashëgimisë kulturore. Sot, nuk ka etni apo komb të gjallë në botë që nuk e ka thesarin e vet autentik kulturor. Pra, identiteti kulturor është, në fakt, amza e identitetit kombëtar. Në çdo përpjekje për cenim të identitetit kulturor alarmohet mbarë një komb dhe, në të tilla raste, jo vetëm që vie në shprehje intervenimi i institucionet përkatëse nacionale por, nëse e do nevoja, në gjendje gatishmërie vihen edhe institucionet relevante për mbrojtje dhe siguri nacionale e shtetërore.
Kështu ndodhë në shtetet komb, ndërsa në shtetet e shquara për nga diversiteti etnik, rregullat vihen mbi të tjera parime, sidomos mbi parimin e “thesarit shtetëror”: pasuria e shtetit i përket të gjithëve, pasuria e të gjithëve ruhet dhe mbrohet nga shteti. Ky parim është karakteristikë e shteteve me traditë të gjatë demokratike. Ekziston edhe tipi tjetër i shtetit me diversitet etnik i cili për sistem të rregullave ka zgjedhur atë në mes të totalitarizmit dhe shovinizmit. Në një shtet të tillë gjithmonë ushtrohet dominanca e etnisë shumicë dhe kjo shprehet duke ushtruar superioritet absolut mbi çdo gjë, mbi politikën, ekonominë, tregëtinë, arsimin, kulturën, mbi shoqërinë në tërësi. Shembull eklatant i demonstrimit të këtij superuoriteti janë shumica e shteteve të ish-bllokut socialist, rrjedhimisht edhe Maqedonia e Veriut./GJILANI INFO/
