Njësia e Hetimeve të Stacionit Policor në Viti, me datën 15.01.2026, si rezultat i zhvillimit të veprimeve intensive hetimore ka arritur që të identifikojë dhe arrestojë dy persona të dyshuar meshkuj kosovar M.J. (viti i lindjes 2002) dhe B.K. (viti i lindjes 2006), kanë njoftuar autoritetet zyrtare policore.
Bëhet e ditur se arrestimi i tyre është bërë, me dyshimin se janë përfshirë në disa raste të vjedhjesh të rënda që kanë ndodhur në tri institucione arsimore të komunës së Vitisë.
“Dyshohet se në bashkëveprim në tri lokacione të institucioneve arsimore kanë vjedhur një sasi e konsiderueshme e pajisjeve dhe mjeteve, përfshirë laptop, iPad, projektorë dhe pajisje të tjera të teknologjisë e mjete të ndryshme pune”, thuhet nga policia.
Ndërkaq në kuadër të procedurave ligjore, me urdhër të gjykatës kompetente, janë realizuar kontrolle në dy lokacione, gjatë të cilave janë gjetur dhe konfiskuar dëshmi materiale relevante përkatësisht sende të dyshuara të vjedhura, të cilat pas verifikimeve janë ndërlidhur me rastet në fjalë.
Të dyshuarit janë intervistuar në prani të avokatëve mbrojtës dhe të njëjtit me vendim të Prokurorit të Shtetit janë dërguar në mbajtje për 48 orë. /Gjilani INFO/
