Presidentët e urdhrave veterinarë që u mblodhën në Shqipëri diskutuan zhvillimet më të fundit për ndryshimet veterinare në Bashkimin Evropian
Përfaqësues të Visegrad Vet+ përbërë nga Urdhra të Mjekëve Veterinarë nga vendet e Evropës si Hungaria, Kroacia, Polonia, Çekia, Bavaria, Italia, Greqia, Serbia, Bosnja, Maqedonia e Veriut, Sllovakia, Sllovenia si dhe Presidentet respektive të Federatës Evropiane të Veterinarisë, Unioni Evropian i Veterinerëve të Praktikës, Unioni Evropian i Higjienistëve Veterinar, shoqata “Dogs Trust”, mbajtën takimin sot, më 11/05/2024, në Tiranë.
Ata diskutuan zhvillimet më të fundit për ndryshimet veterinare në Bashkimin Evropian. Thelbi është shëndeti i kafshëve në dobi të shëndetit të njeriut, pra, “one health” u ngritën dhe u diskutuan çështje të ndryshme si regjistrimi dhe unifikimi i pasaportave për qentë dhe macet, duke ndërprerë abuzimet me kafshët e vogla e duke monitoruar dhe kontrolluar sëmundjen e tërbimit, e cila është një rrezik potencial për njerëzit. Po ashtu, u fol për rezistencën ndaj antibiotikëve dhe përdorimin e barnave veterinare te kafshët bujqësore, dhe për kërkesat e fundit të BE.
E ftuar ishte dhe Ministrja e Bujqësisë, Anila Denaj, e cila u shpreh se fokusi i Ministrisë së Bujqësisë është mbrojtja e shëndetit të konsumatorit duke mbështetur shërbimin veterinar privat dhe shtetëror.
Ajo vuri theksin në parimin “një botë, një shëndet” dhe gatishmërinë e dikasterit për mbështetjen e veterinarëve të Shqipërisë.
Po ashtu, takimin e përshëndeti dhe Dekani i Fakultetit të Mjekësisë Veterinare, Rezart Postoli, Drejtori i Autoritetit Kombëtar të Veterinarisë dhe Mbrojtjes së Bimëve, Roland Meçaj dhe Doktor Artan Xhafa.
Në fund të takimit, dhomat veterinare evropiane falënderuan Urdhrin e Mjekëve Veterinar të Shqipërisë për mikpritjen edhe organizimin dhe arritën në konkluzion për të përpiluar së bashku një dokument për Komisionin Evropian mbi ndryshimet ligjore që duhet të ndodhin mbi temat e mësipërme.
Të gjithë një zëri dhanë mesazhin nga Tirana se Shkenca veterinare është pararojë e shëndetit publik.
Ky ishte takimi parë që u mbajt në Shqipëri në këto nivele të organizatave Veterinare te Bashkimit Evropian.
Pjesëmarrës në cilësinë e mysafirit, ishte edhe Oda e Veterinerëve e Kosovës, ku me delegacionet e pranishme kishte takime të frytshme. /Gjilani Info/
