Sot shënohen 27 vite nga një prej ngjarjeve më të dhimbshme të historisë së Kosovës – dëbimi masiv i shqiptarëve gjatë luftës së viteve 1998–1999.
Në atë periudhë, rreth një milion qytetarë u detyruan të braktisin shtëpitë e tyre për shkak të dhunës së ushtruar nga forcat serbe, duke kërkuar strehim në Shqipëri, Maqedoni të Veriut dhe Mal të Zi.
Përveç largimit jashtë vendit, mijëra persona u strehuan edhe në zonat malore brenda Kosovës, në përpjekje për t’i shpëtuar dhunës. Në mesin e tyre kishte gra, fëmijë dhe të moshuar, të cilët përjetuan kushte të rënda dhe sakrifica të mëdha.
Eksodi i popullsisë u thellua edhe më tej gjatë fushatës së bombardimeve të NATO-s ndaj ish-Jugosllavisë, duke e shndërruar këtë periudhë në një nga kapitujt më tragjikë të historisë së vendit.
Kjo ngjarje përkujtohet çdo vit si simbol i vuajtjes, por edhe i solidaritetit njerëzor.
Një nga vendet që mbetet i lidhur ngushtë me këtë kujtesë është Kukësi, ku gjatë luftës u strehuan dhe u ndihmuan mijëra refugjatë nga Kosova./Gjilani INFO/
