Aktivitetet e fushës së enigmatikës në kuadër të Manifestimit Mbarëkombëtar të Kulturës “Flaka e Janarit 2023”, kanë vazhduar edhe me një tryezë ku është debatuar për enigmatikën dhe të arriturat e saja si dhe është promovuar libri i ri “Rrokjesorë magjikë 4X4”, me autor Zijadin Hasani, mjeshtër i enigmatikës.
Kjo tryezë e cila u organizua nga Shoqata e Enigmatëve “Ndre Mjeda” nga Gjilani, u moderua nga Rexhep Hasani i cili theksoi se hapat e parë të enigmatikës shqiptare i kanë formua autorë dhe redaktorë të njohur të Kosovës, disa përtej të cilëve janë pjesë e kësaj tryeze, e cila ka për qëllim t’i evokojë fillet e enigmatikës shqiptare, pse jo edhe për ngecjet e saja.
Ai shtoi se pas Horizontit në treg dolën edhe revista tjera enigmatike për të pasuruar këtë fushë.
Me daljen e Horizontit në vitet e 80-ta, Gjilani shquhet si qytet i kulturës dhe i enigmatikës dhe me revistë ne parë shqiptare të kësaj fushe zë vend të merituar në mesin e shumë revistave regjionale dhe ato evropiane.
Xhemë Karadaku ka folur për librin e ri “RROKJESORË MAGJIKË 4X4” të autorit, Zijadin Hasani, mjeshtër i enigmatikës.
“Ky libër ka 399 rrokjesor magjik 4×4, dhe në fakte është si një revistë për enigmatikë. Libri nuk lexohet shembull si një roman, por për dashamirët e enigmës është një sfidë që të fton në një duel interesant për zgjidhjen e rrokjesorëve”, ka thënë ai.
Faik Shkodra ka përgëzuar autorin për vlerat që i ka sjellë me këtë botim. Ai ka shtuar se autori i librit, Zijadin Hasani ka krijuar profilin e një intelektuali dhe krijuesi të veçantë, sepse edhe vet enigmatika është e veçantë.
Shkodra ka thënë se Hasani ka merita të veçanta edhe për themelimin e Shoqatës së Enigmatëve, por edhe të botimit të revistës “Horizonti”, një traditë kjo, që do t’i shërbej brezave.
Ai tha tutje se libri në fjalë ka vlera edukative e arsimore sepse shumica e enigmave në këtë libër lidhen me problemet matematikore, logjike dhe nxit imagjinatën dhe të menduarit.
Recensenti i librit, Mensur Mamuti nga Tetova ka thënë se enigmatika duhet të merret seriozisht sepse është e rëndësishme sidomos për gjenerata të reja dhe institucionet duhet pasur parasysh për përfshirje në shkolla.
Duke folur për librin, e ka quajtur autorin doajen të enigmatikës, e ka vlerësuar edhe llojin e enigmatikës me të cilin është marrë në këtë libër që është lloj i vështirë, por me vlerë, sidomos përdorimi i fjalëve të rralla dhe mbulimi i fushave të ndryshme.
Ismail Gagica, në fjalën e tij është fokusuar në 70-vjetorin e enigmatikës shqiptare. Duke folur për të arriturat në enigmatikë, ai është fokusuar te Gazeta Rilindja si nismëtare e enigmatikës shqipe, ku u mundësua botimi i enigmave të ndryshme, por nga ku edhe lindën dhe u shtuan përditë enigmatë të ndryshëm.
“Pra, me një fjalë gazet Rilindja ishte nismëtarja e botimit të enigmave moderne shqipe duke qenë prijetare e dhënies së standardeve të botimeve të mëvonshme, konform standardeve moderne botërore të botimeve enigmatike”, ka thënë Gagica.
Kontribut në këtë tryezë kanë dhënë me diskutimet të tyre edhe: Xhevdet Kallaba, Avdush Canaj, Xhavit Hajdari, Skender Tullumi, Ekrem Krasniqi, Shemsedin Kryeziu e ndonjë tjetër, ndërsa autori i librit Zijadin Hasani e ka falënderuar zyrën e kryetarit, përkatësisht Drejtorinë për Kulturë, Rini e Sport, që ka mundësuar që në kuadër të “Flakës së Janarit“ të mbahen edhe garat në enigmatikë dhe të mbahet kjo tryezë.
Flaka e Janarit 2023”, vazhdon tutje rrjedhën e saj me aktivitetin e radhës të Festivalit të Dramës “Talia e Flakës”, ku në program është shfaqja e natës së gjashtë, e fundit për këtë edicion të “Talias…”, ku para artdashësve do të jepet shfaqja “Pak Pakt” , nga Teatri Kombëtar Eksperimental “Kujtim Spahivogli”, Tiranë. /GJILANI INFO/
