Perëndimi nuk duhet ta mbështesë një njeri të tillë
Vazhdojnë protestat në Serbi kundër presidentit Aleksandar Vuçiq. Shumëkush e ka vlerësuar Vuçiqin si të moderuar, mirëpo realiteti flet të kundërtën. Ai po del të jetë edhe më diktator se Sllobodan Millosheviqi.
Le të kujtojmë se ish-presidenti Millosheviq dha dorëheqje më 7 tetor 2000, pas presionit të madh popullor dhe protestave masive që pasuan zgjedhjet presidenciale të 24 shtatorit 2000 në Jugosllavi. Pra, vetëm dy javë protesta dhe ai dha dorëheqjen, ndonëse fillimisht refuzoi ta pranonte humbjen përballë kandidatit opozitar Vojisllav Koshtunica. Më pas, përballë revoltës së madhe qytetare dhe ndërhyrjes së institucioneve të sigurisë, ai u detyrua të tërhiqej.
Ndërkohë, Vuçiqi po përballet për herë të katërt me protesta që kërkojnë largimin e tij. Fillimisht, më 2018, protestat nisën pas sulmit fizik ndaj politikanit opozitar Borko Stefanoviq dhe zgjatën sporadikisht deri në vitin 2020. Vuçiqi nuk dha dorëheqje. Pastaj, në korrik të vitit 2020, shpërthyen protesta kundër izolimit që qeveria serbe kishte shpallur për shkak të pandemisë. Edhe pse pati përplasje të dhunshme, Vuçiqi sërish nuk u largua.
Më tej, protestat kundër tij u intensifikuan në maj të vitit 2023, pas dy sulmeve të armatosura në Beograd, ku mbetën të vrarë shumë persona. Dhe së fundmi, pas zgjedhjeve të dhjetorit 2023 dhe në shkurt të vitit 2024, protestuesit kërkuan dorëheqjen e Vuçiqit për shkak të manipulimeve të pretenduara me votat.
Për më shumë se shtatë muaj, studentët kanë organizuar protesta në të gjithë Serbinë, duke kërkuar përgjegjësi politike dhe penale për vdekjen e 16 personave nga shembja e një strehimi betoni në Stacionin Hekurudhor të Novi Sadit.
Por Vuçiqi nuk jep dorëheqje, duke u treguar më autoritar se Millosheviqi, dhe duke e vendosur pushtetin mbi çdo gjë.
Prandaj, Perëndimi nuk duhet ta mbështesë një njeri të tillë, i cili tregohet agresiv ndaj Kosovës dhe tenton të destabilizojë situatën në rajon.
