Dr. Edin Nevzati punon si neurokirurg në SHBA, në Universitetin e Kolorados ndërsa ruan lidhjen shkencore dhe pedagogjike me Universitetin e Bazelit
Mjek specialist i neurokirurgjisë, docent privat në Universitetin e Bazelit dhe neurokirurg në SHBA, në Denver, Kolorado. Pasi kishte mbaruar specializime të ndryshme në Spitalin Universitar të Kolorados, nga pranvera që shkoi ai është ftuar nga po ky spital prestigjioz amerikan, ku tashmë ai është duke punuar. Para kësaj ai kishte punuar si mjek drejtues në Departamentin e Neurokirurgjisë në Spitalin Kantonal të Lucernit. Kjo është vetëm një pjesë e “portofolios” së bashkëbiseduesit tonë, Dr. Edin Nevzati. Për të tjerat dhe rrugën e ndjekur deri këtu, në intervistën në vijim.
Albinfo.ch: A mund të na e përshkruani me pak fjali rrugën tuaj profesionale, që nga mbarimi i studimeve të mjekësisë deri në pikën ku keni arritur tani?
E. Nevzati: Pas studimeve të mjekësisë në Cyrih, përfundova specializimin në neurokirurgji në Spitalet Kantonale të Aarau dhe Luzern, duke përfshirë një qëndrim kërkimor 10-mujor në Inselspital, Bern. Punën time të parë si mjek specialist në neurokirurgji e fillova në moshën 33-vjeçare në Spitalin Kantonal të Luzernit. Në verën e vitit 2017, së bashku me familjen, shkova për një nën-specializim në neuro-onkologjinë operative (trajtim i tumoreve të trurit) në Spitalin Universitar të Denverit, Kolorado. Pasoi një vit i dytë në kirurgjinë komplekse të shtyllës kurrizore, gjithashtu në Spitalin Universitar të Kolorados, para se të rikthehesha në Luzern si mjek i lartë në vitin 2019. Në moshën 40-vjeçare, u zgjodha si mjek drejtues në departamentin e neurokirurgjisë në Spitalin Kantonal të Luzernit dhe njëkohësisht u emërova edhe si docent privat në Universitetin e Bazelit. Në pranverë, pranova një thirrje për të vazhduar punën time në Denver, Kolorado.
Albinfo.ch: Si një nxënës dhe pastaj student me prejardhje të huaj, a ka pasur barriera gjatë këtij rrugëtimi, që do t`ua vështirësonin rrugën e ngritjes profesionale në krahasim me atë të kolegëve të tu, të lindur në Zvicër?
E. Nevzati: Kjo pyetje është e vështirë për t’u përgjigjur, pasi ndikohet nga perceptimet subjektive dhe emocionet, të cilat nuk përputhen domosdoshmërisht me realitetin. Fakti është që në vitet 1990 kishte relativisht pak nxënës dhe nxënëse me origjinë shqiptare në gjimnaze, të cilat luajnë një rol të rëndësishëm në krijimin e bazave për një karrierë akademike. Megjithatë, me fillimin e mijëvjeçarit të ri, gjithnjë e më shumë nxënës dhe nxënëse me origjinë shqiptare filluan të jenë të pranishëm si në gjimnaze ashtu edhe në universitete.
Nëse në disa situata origjina ka luajtur një rol, kjo mund të jetë e vërtetë, por nuk mund ta vërtetoj. Nëse në disa raste kam ndier se duhej të punoja më shumë se të tjerët për të arritur sukses, kjo gjithashtu mund të jetë e vërtetë, por sërish nuk mund ta vërtetoj. Në çdo rast, në Zvicër, pavarësisht prejardhjes, gjithçka është e mundur. Nuk ka barriera që vendosen, dhe për këtë jam mirënjohës ndaj Zvicrës.
Albinfo.ch: Jeni lindur në Kosovë por jeni rritur dhe shkolluar në Zvicër. A mendoni se fakti që jeni përgatitur profesionalisht në një vend si Zvicra ka qenë përcaktues për arritjet tuaja profesionale?
E. Nevzati: Sa i përket identitetit: born in Kosovo, sa i përket profesionalizmit: made in Switzerland. Zvicra ka universitete shumë të forta në krahasim me standardet ndërkombëtare, të cilat sigurisht ofrojnë një arsimim shumë të mirë në fusha të ndryshme. Nëse ekziston interes dhe ambicia, Zvicra ofron shumë mundësi për t’u zhvilluar më tej. Për më tepër, Zvicra është e njohur ndërkombëtarisht për produkte të ndryshme cilësore, gjë që automatikisht reflektohet në shumë industri. Kjo përfaqëson një avantazh të madh në konkurrencën ndërkombëtare.
Albinfo.ch: Vini nga një familje intelektuale. Prindërit tuaj, edhe pse të ardhur nga Kosova, kishin gjetur rrugën për të vazhduar punën në profesionet e tyre. Sa ka qenë favorizuese për ju, kjo klimë në familje për të zgjedhur rrugën e shkollimit që keni zgjedhur?
E. Nevzati: Mësuesit më të rëndësishëm në jetën e një personi janë prindërit ose kujdestarët ligjorë. Unë admiroj prindërit e mi në çdo aspekt për mënyrën se si ata, në moshën e mesme, u përshtatën shpejt dhe me efikasitet në një vend të ri dhe njëkohësisht rritën tre fëmijë. Arsimi ka qenë gjithmonë i rëndësishëm në familjen tonë. Edhe gjyshërit tanë kishin një arsimim të shkëlqyer, kështu që për ne ishte e qartë që do të ndiqnim këtë rrugë.
Albinfo.ch: “Me emërimin e tij si pedagog privat në shtator 2023, Universiteti i Bazelit njeh arritjet e tij të jashtëzakonshme në kërkimin shkencor dhe mësimdhënien dhe i jep atij një licencë mësimdhënieje (Venia Docendi)”. Kështu thuhet në faqen zyrtare të Universitetit të Bazelit me rastin e emërimit tuaj atje. A mund të na shpjegoni për çfarë bëhet fjalë?
E. Nevzati: Venia Docendi është njohja universitare e një aftësie të veçantë për shkencën dhe mësimdhënien, në rastin tim konkret, në fushën e neurokirurgjisë. Që nga fillimi i specializimit tim, kam pasur fatin të përfshihem në projekte të ndryshme shkencore dhe njëkohësisht të kontribuoj në formimin e studentëve. Kur kërkimi dhe mësimdhënia arrijnë një sasi dhe cilësi të caktuar, kjo mund të vlerësohet nga fakulteti, pas një shqyrtimi të brendshëm, me titullin Venia Docendi/Privatdozent.
Albinfo.ch: Neurokirurgjia, si specializim mjekësor është ndër më sfidueset në mesin e lëmenjve të mjekësisë. Përse u përcaktuar pikërisht për këtë?
E. Nevzati: Arsyeja pse vendosa të zgjedh neurokirurgjinë i detyrohet edhe rastësisë. Gjatë studimeve në mjekësi, studentët kalojnë një vit praktik dhe disa lëndë mund të zgjidhen sipas interesit. Në fakt, dëshiroja të kaloja një muaj në neurologji, por gjatë regjistrimit gabimisht u rreshtova një rresht më poshtë dhe përfundova në neurokirurgji. Më mahniti menjëherë të shihja si kryhen operacionet në tru dhe shtyllën kurrizore.
Pas një reflektimi të gjatë, vendosa që doja të mësoja këtë profesion dhe mjeshtëri, duke qenë i vetëdijshëm që kjo do të kërkonte shumë vite dhe orë të gjata pune. Por, edhe këtu vlen të thuhet se rruga është qëllimi. Gjatë viteve të specializimit, kam pasur mundësinë të krijoj shumë miqësi, të marr pjesë në shumë projekte ndryshme dhe të përjetoj takime shumë interesante.
Albinfo.ch: Jeni në të njëjtën kohë pedagog në Universitetin e Bazelit dhe në spital të Denverit, Colorado. Si arrihet kjo, qoftë edhe si sfidë fizike a teknike?
E. Nevzati: Aktualisht punoj si neurokirurg në SHBA, më saktësisht në Denver, Kolorado. Këtu kam një detyrë klinike dhe akademike në Universitetin e Kolorados. Më parë kam punuar si mjek drejtues në Spitalin Kantonal të Lucernës. Në fakt, vazhdoj të ruaj lidhjen shkencore dhe pedagogjike me Universitetin e Bazelit. Me një organizim të mirë dhe falë mundësive virtuale, mund të vazhdoj të kem privilegjin të jem aktiv si pedagog në Universitetin e Bazelit. Paketa e një mjeku klinik dhe akademik aktiv, si dhe baba i tre fëmijëve, nuk do të ishte e mundur pa mbështetjen e bashkëshortes sime. Me kënaqësi dëshiroj të falënderoj familjen time për mbështetjen dhe gatishmërinë për t’u përfshirë gjithnjë në aventura të reja.
“Rastësisht” neurokirurg
“Arsyeja pse vendosa të zgjedh neurokirurgjinë i detyrohet edhe rastësisë.
Gjatë studimeve në mjekësi, studentët kalojnë një vit praktik dhe disa lëndë mund të zgjidhen sipas interesit. Në fakt, dëshiroja të kaloja një muaj në neurologji, por gjatë regjistrimit gabimisht u rreshtova një rresht më poshtë dhe përfundova në neurokirurgji. Më mahniti menjëherë të shihja si kryhen operacionet në tru dhe shtyllën kurrizore”.
