Albinfo.ch sjell edhe një tregim suksesi të shqiptarit nga Kosova në Suedi
Shumë shqiptarë të Kosovës po arrijnë suksese në diasporë, duke u bërë emra të njohur dhe duke zotëruar poste të mira pune. Suedia pa dyshim se është një nga shtetet evropiane, ku mundësia e arsimimit, punësimit, depërtimit në karrierë dhe formimit profesional e etik është shumë e madhe.
Arritjeve të shqiptarëve në këtë shtet pa dyshim i shtohet edhe Ndriqim Gojani, që tashmë udhëheq dizajnin e makinave në fabrikën “Volvo”, shkruan albinfo.ch.
Pasioni për zgjidhjen e problemeve, zhvillimin e produktit, industrinë e automobilave dhe shpikjet e vazhdueshme e kanë dërguar të riun Ndriqim Gojani që së fundmi të marrë rolin e udhëheqësit në dizajnimin e makinave në fabrikën Volvo në Suedi.
Me punë e angazhim individual, çdokund në botë mund të dalin punëtorë të mirë, por ajo që ndodhi me kosovarin nga Suedia dhe me rezultatet e tij nuk ishin të rastësishme. Ato realisht ishin fryt i punës së vazhdueshme, sistematike e konsistente të një eksperti të përkushtuar, siç është Ndriqimi.
Ai ka marrë rolin e udhëheqësit në dizajnimin e makinave në fabrikën Volvo dhe do të drejtojë projekte të ndryshme inovative, të cilat synojnë zhvillimin dhe përmirësimin e kufizimeve frontale dhe rregullimi i çështjeve të cilësisë. /Albinfo.ch
