Ata ndjehen keq që nuk ka ndonjë organizim i cili do të mund t`i orientonte për investime këtu.
Islam dhe Ismajl Maliqi janë dy vëllezër mërgimtarë, afaristë nga Presheva, që veprojnë në Zvicër. Malli për vendlindjen i sjell shpesh në Preshevë, por ata ndjehen keq që nuk ka ndonjë organizim, i cili do të mund t`i orientonte për investime këtu.
E në Komunën e Bujanocit ka disa ditë që për nder të mërgimtarëve janë vendosur flamujt e shteteve të Bashkimit Europian, në të cilat jetojnë mërgimtarët shqiptarë të Luginës së Preshevës.
Kryetari i Komunës, Nagip Arifi, ka pritur në kabinetin e tij shumë mërgimtarë, të cilëve iu ka prezantuar projekte konkrete, ku ata mund të investojnë, raporton rtk, përcjell Albinfo.ch.
Ardhja e mërgimtarëve i ka dhënë një gjallëri Luginës së Preshevës, për bizneset e këtushme, muajt e mërgimtarëve janë muaj që sigurojnë mbijetesën e tërë vitit.
Më se dyzet për qind e popullatës shqiptare në Luginën e Preshevës, sipas statistikave, jeton në vendet e Europës Perëndimore e edhe në Amerikë. Remitencat e tyre paraqesin një potencial jashtëzakonisht të rëndësishëm për mbijetesën e popullatës shqiptare në këtë krahinë, ku zhvillimi ekonomik, punësimi dhe standardi i jetës është më i ulëti në rajon.
