Komuna e Vitisë, në bashkëpunim me Dhomën e Tregtisë dhe Industrisë së Kosovës (DHTIK), ka organizuar takim me përfaqësues të komunitetit të biznesit, me qëllim të diskutimit të sfidave, nevojave dhe mundësive për zhvillimin e sektorit privat.
Në takim mori pjesë Kryetari i Komunës së Vitisë, Sokol Haliti, i cili theksoi rëndësinë e bashkëpunimit të vazhdueshëm me komunitetin e biznesit.
“Komuna e Vitisë mbetet e përkushtuar të jetë partner i bizneseve dhe të punojë së bashku me ta për krijimin e kushteve sa më të mira për zhvillim ekonomik, investime dhe hapjen e vendeve të reja të punës.” – tha Kryetari Sokol Haliti.
Në emër të Dhomës së Tregtisë dhe Industrisë së Kosovës, të pranishmëve iu drejtua Skender Krasniqi, Kryetar i Bordit të DHTIK-së, i cili theksoi rëndësinë e takimeve të drejtpërdrejta me bizneset nëpër komunat e Kosovës.
Gjatë takimit, bizneset vitiase paraqitën shqetësimet dhe sfidat me të cilat përballen, ndër të cilat u veçuan mungesa e linjës së energjisë elektrike në Zonën Industriale në Budrikë, si dhe ndërprerjet e planifikuara të furnizimit me energji elektrike gjatë ditëve të punës, të cilat ndikojnë në funksionimin e rregullt të bizneseve.
Takimi u vlerësua si një hap i rëndësishëm drejt forcimit të dialogut ndërmjet institucioneve dhe komunitetit të biznesit, si dhe adresimit të çështjeve konkrete që ndikojnë në zhvillimin ekonomik të Komunës së Vitisë./Gjilani INFO/
