Kuvendi Komunal i Gjilanit ka miratuar sot propozimin e Drejtorisë për Zhvillim Ekonomik për heqjen e taksës komunale për bizneset dhe faljen e të gjitha borxheve të akumuluara për këtë taksë gjatë periudhës 2000–2026.
Sipas drejtuesve të Drejtorisë për Zhvillim Ekonomik, ky vendim synon lehtësimin e barrës financiare të bizneseve dhe krijimin e një mjedisi më të favorshëm për zhvillimin e sektorit privat dhe ekonomisë lokale. Njëkohësisht, përmes faljes së borxheve, u jepet fund detyrimeve të vjetra për këtë taksë, të cilat kanë vazhduar të figurojnë ndër vite.
“Komuna e Gjilanit, përmes Drejtorisë për Zhvillim Ekonomik, mbetet e përkushtuar në ndërmarrjen e masave konkrete për mbështetjen e bizneseve, nxitjen e investimeve dhe krijimin e kushteve më të mira për zhvillimin ekonomik të qytetit”, thuhet ne njoftimin e Komunës./Gjilani INFO/
