Drita e ka nisur me këmbë të mbarë sezonin e ri në Albi Mall Superligën e Kosovës duke mposhtur me rezultat 3-1 skuadrën e Ferizajt.
Vendasit e nisën më mirë takimin duke kontrolluar tempon e lojës, madje duke rrezikuar në dy raste portën e Terziqit.
Ferizaj rastin më ideal në këtë takim e kishte në minutën e 59-të përmes Edon Sadriut i cili lëshoi një mundësi të artë shënimi.
Ishte Almir Ajzeraj ai i cili u përkujdes për t’i dhënë epërsinë Dritës duke shënuar për 1-0 pas asistimit nga Besnik Krasniqi.
Drita e gjeti golin edhe njëherë tjetër në minutën e 90-të, ku autor i saj ishte Arb Manaj që realizoi për 2-0 pas asistimit të Almir Ajzerajt.
Deri në fishkëllimën e fundit Ferizaj ia doli ta gjejë golin me anë të Edon Sadriut nga penalltia për 2-1, por të besuarit e Zekirija Ramadanit shënuan edhe një herë tjetër.
Ishte Ilir Mustafa ai që vulosi fitoren e Dritës me rezultat 3-1 duke shënuar me kokë pas krosimit të Besnik Krasniqit.
