Alpinisti nga tetova, Nadir Murseli sot nga qyteti turk Kahramanmarash na dërgoi informatë dhe fotografi për shpëtimin e pabesueshëm të vajzës së mbijetuar dhjetëvjeçare e cila madje shtatë ditë ishte nën rrënoja.
Ai u nis në Turqi ku iu bashkua shpëtimtarëve nga Bosnja e Hercegovina. Ky ekip së bashku me ekipin turk AFAD arritën ta nxjerrin vajzën e mbijetuar.
“Rreth orës 13:00 sapo e nxorëm vajzën irmak, patëm gëzim të madh këtu. Që këtu u dëgjua një zë, tre-katër orë punuam për ta nxjerrë nga rrënojar. Mrekulli e madhe është se si ka mbijetuar. Ajo ishte shtatë ditë nën rrënoja, ndërsa ndërtesa ishte shtatë-tetë kate”, informoi 45-vjeçari Murseli nga Tetova.
Ai prej 9 shkurtit ndodhet në rajonet e goditura nga tërmeti në Turqi, më saktë në Kahramanmarash, në juglindje të vendit.
Alpinisti tetovar flet rrjedhshëm gjuhën turke, kështu që ekipit nga Bosnja e Hercegovina, përveç në kërkimin nën rrënoja, u ka ndihmuar edhe me përkthime.