Katër raste të dhunës në familje janë raportuar në Gjilan gjatë datave 13, 14 dhe 15 nëntor 2026.
Sipas raportit të Policisë së Kosovës, në rastin e parë, një shtetas i Maqedonisë së Veriut dyshohet se kishte ushtruar dhunë psikike ndaj një gruaje kosovare. I dyshuari është arrestuar nga njësiti i hetimeve në Gjilan më 14 nëntor.
Në rastin e dytë, një burrë kosovar është arrestuar nën dyshimin se kishte ushtruar dhunë psikike ndaj një gruaje kosovare.
Ndërkaq, në rastin e tretë, një tjetër burrë kosovar dyshohet se kishte ushtruar dhunë psikike dhe fizike ndaj një burri kosovar.
Rasti i katërt ka të bëjë me një burrë kosovar, i cili dyshohet se kishte ushtruar dhunë psikike ndaj një burri tjetër kosovar.
Policia ka bërë të ditur se, me vendim të prokurorit të shtetit, të katër të dyshuarit janë dërguar në mbajtje.
Rastet janë duke u trajtuar nga organet kompetente./Gjilani INFO/


