Dhuna në familje vazhdon të mbetet një nga fenomenet më shqetësuese në Kosovë. Vetëm gjatë një dite, Policia e Kosovës ka regjistruar pesë raste të ndara të dhunës në familje në komunat e Prishtinës dhe Pejës, ku disa persona kanë përfunduar në mbajtje, ndërsa viktimat kanë marrë trajtim mjekësor.
Në Prishtinë, në orët e para të mëngjesit të ditës së kaluar, u arrestua një burrë i cili, nën ndikimin e alkoolit, dyshohet se ushtroi dhunë psikike ndaj një mashkulli duke e ofenduar. Pas ngjarjes, i dyshuari tentoi t’i shkaktonte lëndime vetes dhe mori trajtim mjekësor. Me vendim të prokurorit, ai u dërgua në mbajtje.
Po në Prishtinë, një tjetër burrë u arrestua pasi dyshohet se ushtroi dhunë fizike dhe psikike ndaj bashkëshortes së tij. Viktima mori trajtim mjekësor, ndërsa i dyshuari u dërgua në mbajtje.
Në mbrëmje, një rast tjetër u raportua në kryeqytet, ku një burrë dyshohet se demoloi inventarin e shtëpisë dhe shtyu një grua, e cila pësoi lëndime, por refuzoi trajtimin mjekësor. Pas intervistimit, i dyshuari u lirua në procedurë të rregullt.
Ndërkohë, në Pejë, një grua u arrestua pasi dyshohet se ushtroi dhunë psikike dhe fizike ndaj një burri. Viktima mori ndihmë mjekësore, ndërsa bazuar në raportin e mjekut psikiatër, e dyshuara u dërgua në repartin e Psikiatrisë për trajtim.
Po në Pejë, në mbrëmje të kësaj dite, një burrë u arrestua pasi dyshohet se sulmoi fizikisht një grua dhe një burrë. Gjatë ndërhyrjes, policia i sekuestroi një thikë, ndërsa të lënduarit morën trajtim mjekësor. Me vendim të prokurorit, i dyshuari u dërgua në mbajtje.
Policia e Kosovës njofton se të gjitha rastet janë duke u trajtuar në koordinim me prokuroritë kompetente, ndërsa u bën thirrje qytetarëve që të raportojnë çdo formë të dhunës në familje, me qëllim të parandalimit dhe mbrojtjes së viktimave./Gjilani INFO/
