Drejtoria Rajonale e Policisë në Gjilan ka bërë të ditur se gjatë periudhës 19–25 qershor 2026 janë shqiptuar gjithsej 1,659 gjoba trafiku, në kuadër të planeve operative për rritjen e sigurisë në komunikacion.
Sipas policisë, gjatë kësaj periudhe janë hetuar 16 aksidente trafiku me dëme materiale dhe 13 aksidente me persona të lënduar.
Po ashtu, zyrtarët policorë kanë shqiptuar: 48 gjoba për mosvendosje të rripit të sigurisë; 30 gjoba për përdorim të telefonit gjatë drejtimit të automjetit; 8 gjoba për automjete me modifikime të palejuara (folije të errëta) si dhe kanë shqiptuar 24 masa ndalimi të drejtimit të mjeteve motorike ndaj ngasësve që kanë kryer shkelje të rënda.
Policia Rajonale e Gjilanit ka apeluar veçanërisht tek drejtuesit e trotinetëve elektrikë, sidomos të rinjtë, që të respektojnë rregullat e trafikut dhe dispozitat ligjore.
“Drejtimi i trotinetëve pa respektuar normat e parapara me ligj mund të kushtojë me jetë”, thuhet në apelin e Policisë./Gjilani INFO/
