Kryetari i Lidhja Demokratike e Kosovës, Lumir Abdixhiku, së bashku me bartësen e listës së kandidatëve për deputetë nga kjo parti, Vjosa Osmani, kanë vazhduar aktivitetet politike në Gjilan, në kuadër të platformës “Hajde Folim”.
Ata janë takuar dhe kanë bashkëbiseduar me qytetarët gjilanas për çështjet dhe sfidat me të cilat po përballet vendi.
Në këtë aktivitet mori pjesë edhe kryetari i degës së LDK-së në Gjilan, Lutfi Haziri, i cili tha se Gjilani dhe Anamorava i kanë pritur ngrohtësisht Osmanin dhe Abdixhikun.
Sipas Hazirit, takimi u karakterizua nga diskutime të hapura me qytetarët, të cilët shprehën shqetësimet, kërkesat dhe pritjet e tyre për të ardhmen.
Ai theksoi se Kosova po kalon një periudhë të vështirë politike, ndërsa Gjilani, sipas tij, ka mbetur pas në aspektin e zhvillimit dhe investimeve institucionale. Haziri deklaroi se qyteti është lënë jashtë vëmendjes së qeverisë dhe projekteve zhvillimore, por shtoi se qytetarëve nuk mund t’u merret dashuria për vendin.
“Vetëm të bashkuar mund t’ia rikthejmë Kosovës besimin, shpresën dhe drejtimin e duhur”, është shprehur Haziri, i cili njëherësh kandidon edhe për deputet nga radhët e LDK-së./Gjilani INFO/
