Deputeti shqiptar në Parlamentin e Serbisë, Shaip Kamberi ka publikuar letrën e komisioneres së Bashkimit Evropian për Zgjerim, Marta Kos, e cila shkruan për të drejtat e shqiptarëve në Luginë të Preshevës.
Kjo letër vjen, pasi deputeti Kamberi u ka dërguar letra zyrtarëve të lartë të BE-së ku i ka njoftuar për shkeljen e të drejtave të shqiptarëve në Luginë dhe pasivizimin e adresave.
Më poshtë mund ta gjeni postimin e Kamberit dhe pjesë të letrës së Kos, që i ka shkëputur deputeti:
Edhe një përgjigje nga Brukseli
Shqiptarët e Luginës po marrin vëmendje gjithnjë më të madhe në institucionet e Brukselit!
Marta Kos, Komisionere e Bashkimit evropian për zgjerim, nëpërmjet një letre të dërguar, siguron se BE po e përcjellë nga afër trajtimin e pakicave dhe pozitën e tyre në Serbi dhe konfirmon se Kapitulli i 23 është i rëndësishëm për rrugëtimin e Serbisë drejtë BE-së!
Pjesë nga përgjigja e Komisioneres Marta Kos:
I nderuar z. Kamberi,
Dëshiroj t’ju siguroj se Komisioni po ndjek nga afër trajtimin e personave që i përkasin pakicave kombëtare, përfshirë situatën e komunitetit shqiptar në Serbi, gjithashtu në kontekstin e zotimeve të marra nga Serbia në kuadër të negociatave për anëtarësim në BE.
Në kuadër të Kapitullit 23 “Gjyqësori dhe të Drejtat Themelore” të negociatave për anëtarësim, Serbia është e detyruar të zbatojë kuadrin e saj ligjor për të drejtat e personave që u përkasin pakicave në përputhje me standardet ndërkombëtare dhe evropiane.
Lidhur me çështjen specifike të ‘pasivizimit’ të adresave, kemi theksuar në raportin tonë të Paketës së Zgjerimit për vitin 2024 për Serbinë nevojën që autoritetet të shpjegojnë më mirë për publikun se si po kryhen verifikimet e statusit të qëndrimit, gjë që po rezulton në ‘pasivizimin’ e disa adresave dhe nëse jugu i Serbisë është veçanërisht i shënjestruar.
