Teksa po realizonte detyrat në një pikë kontrolli në Prishtinë, policia e Kosovës e ndaloi një automjet për kontroll.
Megjithatë, gjatë këtij procesi, një 26-vjeçari iu gjetën një sasi e konsiderueshme e monedhave metalike nga dy euro.
E në bazë të njoftimeve të Policisë, ky nuk është rasti i vetëm.
Një ditë pas, policia kapi mbi 1 mijë euro para të dyshuara si të falsifikuara edhe në komunën e Vushtrrisë.
Në një përgjigje për Tëvë1, Policia thotë se numri i rasteve të tilla të iniciuara në gjashtë muajt e parë të këtij viti është mbi 460.
“Gjatë vitit të kaluar, Policia ka iniciuar 804 raste të ‘Falsifikimit të parasë’, kurse në gjashtëmujorin e parë të këtij viti ka iniciuar dhe trajtuar 486 raste të tilla. Bazuar në të dhënat e PK-së, për periudhën kohore korrik-shtator 2023. janë iniciuar 303 raste të veprës penale nga Neni 296”, thotë Policia e Kosovës.
Të gjitha këto raste përfundojnë në Agjencinë e Kosovës për Forenzikë, ku edhe bëhet ekspertiza e tyre. Nga kjo agjenci tregojnë se cila është monedha false, e cila qarkullon më së shumti në vend.
Specialisti i Forenzikës i cili merret çdo ditë me verifikimin e këtyre rasteve tregon edhe mënyrën se i identifikohen paratë e falsifikuara.
Për prezencën e madhe të parave të falsifikuar nga Oda Ekonomike e Kosovës thonë se kanë pranuar ankesa edhe nga bizneset.
Për qarkullimin dy eurove false në Kosovë javë më parë kishte raportuar edhe agjencia ndërkombëtare e lajmeve Reuters.
