Christopher Hill, Ambasador i Shteteve të Bashkuara të Amerikës në Serbi, gjatë vizitës në Luginë të Preshevës, pasi takoi drejtuesit shqiptarë lokalë, deklaroi se do të shohë se çfarë mund të bëjë në Beograd, lidhur me adresimin e problemeve të shqiptarëve në Serbi.
Në një video të publikuar nga kryetari i Preshevës, Shqiprim Arifi, në llogarinë e tij në Facebook, diplomati amerikan theksoi se gjatë kësaj vizite, është njoftuar në detaje rreth sfidave të qytetarëve.
“Ne kemi pasur një diskutim dhe kryetari më ka njoftuar në detaje rreth problemeve të qytetarëve në Preshevë. Do të kthehem në Beograd dhe më lini të mendoj dhe të shoh se si mund të jem i dobishëm”, tha Hill.
“Por mendoj se është shumë e rëndësishme se njerëzit e kanë të qartë në atë çfarë e thonë dhe çfarë kërkojnë”, tha Hill
Ai më tej citohet të ketë deklaruar se dialogu Kosovë – Serbi, ka dhënë rezultate shumë të mira dhe do të ndihmojnë në normalizimin e marrëdhënieve mes të dyja vendeve.
E kryetari i Preshevës, Shqiprim Arifi, ka thënë se për t’u përfshirë në negociata, kërkojnë të drejta të barabarta për shqiptarët e Luginës me të minoriteteve në rajon.
