Zyra Erasmus+ në Kosovë, në bashkëpunim me Universitetin Publik “Kadr Zeka”, mbajti sot një sesion informues për mundësitë e aplikimit në fondet dhe programet ndërkombëtare që ofron Erasmus+.
Ky sesion u organizua në vazhdën e hapjes zyrtare të Thirrjes së Erasmus+ për vitin 2026. Thirrja e re u ofron institucioneve të arsimit të lartë, organizatave rinore dhe institucioneve të trajnimit profesional në Kosovë mundësi të reja për bashkëpunim ndërkombëtar, mobilitet dhe zhvillim kapacitetesh.
Në hapje të takimit, Udhëheqësi i Zyrës për Bashkëpunim Ndërkombëtar Betim Berisha, përshëndeti pjesëmarrësit dhe theksoi rëndësinë e përfshirjes aktive të studentëve dhe stafit akademik në programet ndërkombëtare të bashkëpunimit, si një mundësi e vlefshme për ngritje profesionale dhe shkëmbim përvojash me universitete partnere evropiane.
Sesioni informues vazhdoi me prezantimin e veprimeve kryesore të programit Erasmus+, nga Mimika Dobroshi dhe Blerinë Zjaça, nga Zyra Erasmus+ në Kosovë.
Pjesëmarrësit në sesion morën një përmbledhje të shkurtër mbi dimensionin ndërkombëtar të programit Erasmus+, duke u njohur me mënyrat se si institucionet e arsimit të lartë në Kosovë lidhen dhe bashkëpunojnë përmes këtij programi. Diskutimi u zhvillua në formë interaktive, me përfshirjen e të pranishmëve për të ndarë njohuritë dhe pritjet e tyre ndaj programit.
Në këtë sesion u prezantuan mundësitë për:
– International Credit Mobility
– Degree Mobility (Erasmus Mundus Action)
– Capacity Building in Higher Education (CBHE)
– Capacity Building in VET (CBVET)
– Jean Monnet Actions
– Virtual Exchanges
– ECHE dhe EUA
Pjesëmarrësit patën mundësinë të diskutojnë dhe të ndajnë përvoja nga projektet e mëparshme, si dhe të eksplorojnë mënyra për forcimin e mobilitetit dhe bashkëpunimit ndërkombëtar në të ardhmen./Gjilani INFO/
