Në sheshin e qytetit të Vitisë u mbajt mbrëmë nata qendrore e edicionit të pestë të Festivalit Ndërkombëtar të Folklorit, Valleve dhe Riteve “N’Karadak Krisin Tupanat”, një ngjarje që mblodhi artistë nga vende të ndryshme të botës dhe dhuroi një atmosferë të veçantë për qytetarët dhe mërgimtarët.
Në këtë aktivitet kulturor morën pjesë edhe kryetari i Komunës së Vitisë, Sokol Haliti, së bashku me drejtorin për Kulturë, Rini dhe Sport, Valmir Sahiti, të cilët ndoqën nga afër programin artistik.
Edicioni i sivjetmë solli në skenë ansamble folklorike dhe delegacione nga Luksemburgu, Peruja, Panamaja, Polonia, Portugalia, Meksika, Qiproja Veriore, Turqia, Egjipti, Shqipëria, Kosova dhe Maqedonia e Veriut. Përmes valleve, këngëve dhe riteve tradicionale, pjesëmarrësit prezantuan kulturën dhe trashëgiminë e vendeve të tyre, duke krijuar një urë miqësie dhe bashkëpunimi mes popujve.
Festivali “N’Karadak Krisin Tupanat” organizohet me mbështetjen e Organizatës Ndërkombëtare të Festivaleve Folklorike (CIOFF), ku anëtar është edhe Ansambli i Këngëve dhe Valleve “Kemajl Azizi” nga Vitia, organizatori i këtij aktiviteti që tashmë është shndërruar në një traditë të rëndësishme kulturore në Anamoravë./Gjilani INFO/
