Kryetari i Komunës së Vitisë, Sokol Haliti në një lidhje të drejtpërdrejtë për programin e mëngjesit të RTK-së, “Mirëmëngjesi Kosovë” tha se këtë vit ka rritje të numrit të mërgimtarëve.
Komuna ka përgatitur program të pasur për mikpritje ndaj tyre, duke përfshirë festivale, koncerte e panaire.
“Është rritje enorme për shkak se Vitia ka filluar të zhvillohet me rini, në infrastrukturë, ka filluar t’i krijoj kushtet që qytetarët dhe mërgimtarët të ndjehen mirë”, ka thënë Haliti për RTK-në.
Ai ka përmendur disa projekte të cilat i ka ndërmarrë komuna, duke përfshirë ato të infrastrukturës, ekonomisë e kulturës. Një nga sferat që Haliti ka thënë se e kanë në fokus është edhe arsimi. Ndër të tjera ai theksoi se në këtë drejtim ka rritur bursat komunale nga 150 në 318 euro.
“Kemi progres të theksuar edhe teknikisht por edhe në ngritje të kualitetit. E tregojnë edhe testet e fundit, nëse i shikoni studentët e Vitisë po i zënë vendet e para në mjekësi dhe drejtime deficitare që është punë e mirë e mësimdhënësve këtu”, është shprehur Haliti.
