Kryetari i Komunës së Vitisë, Sokol Haliti, ka zhvilluar një takim me përfaqësues të organizatave dhe institucioneve ndërkombëtare, në kuadër të përgatitjeve për edicionin e gjashtë të samitit “The Youth Summit on Peace & Sustainable Future 2026”, i cili do të mbahet në Viti nga 25 deri më 29 gusht të vitit të ardhshëm.
Në takim morën pjesë dr. Andrise Bass nga Instituti për Hulumtim në Politika Publike dhe Diplomaci (IPPDR Centro) me seli në Nju Jork, dr. Arsène Romaric, themelues i Fondacionit Ndërkombëtar të Diasporës Latino-Afrikane, ekspertja për Zhvillim të Qëndrueshëm pranë OKB-së, Mahaha Vladimire, si dhe dr. Dylbere Dika, drejtoreshë e Përgjithshme e Misionit Diplomatik për Paqe dhe Prosperitet (DMPP) me seli në Tiranë.
Gjatë takimit u diskutuan përgatitjet për organizimin e këtij aktiviteti me karakter ndërkombëtar, i cili realizohet në bashkëpunim mes Komunës së Vitisë, Misionit Diplomatik për Paqe dhe Prosperitet (DMPP) dhe partnerëve të tjerë ndërkombëtarë që veprojnë në fushat e diplomacisë, paqes dhe zhvillimit të qëndrueshëm.
Kryetari Haliti vlerësoi se organizimi i samitit përbën një mundësi të rëndësishme për promovimin e Vitisë në arenën ndërkombëtare, duke theksuar se komuna do të shndërrohet në një pikë takimi për dialogun, bashkëpunimin dhe fuqizimin e të rinjve.
Ai theksoi se institucionet komunale do të vazhdojnë të mbështesin iniciativa që krijojnë mundësi të reja për të rinjtë dhe kontribuojnë në ndërtimin e një të ardhmeje më të sigurt dhe më të qëndrueshme.
Përfaqësuesit ndërkombëtarë falënderuan Komunën e Vitisë për mbështetjen dhe gatishmërinë e treguar për organizimin e samitit. Sipas tyre, vendimi që edicioni i gjashtë i këtij aktiviteti të zhvillohet në Kosovë dhe pikërisht në Viti është marrë pas përvojave të suksesshme të organizimeve të mëparshme në vende të ndryshme të botës, përfshirë Meksikën dhe Francën.
Po ashtu, u vlerësua se pjesëmarrësit nga shumë shtete do të kenë mundësinë të njihen me kulturën, traditat dhe potencialet turistike që ofron Vitia.
“The Youth Summit on Peace & Sustainable Future 2026” pritet të mbledhë të rinj, ekspertë, diplomatë dhe përfaqësues institucionesh nga vende të ndryshme, me fokus promovimin e paqes, dialogut ndërkulturor dhe zhvillimit të qëndrueshëm./Gjilani INFO/
