Është vënë gurthemeli i ndërtesave për banimin e përballueshëm dhe social në Gjilan. Në këtë ceremoni ishte kryetari i Komunës së Gjilanit, Alban Hyseni, bashkë me kryeministrin e Kosovës, Albin Kurtin, zëvendësministrin e Mjedisit, Planifikimit Hapësinor dhe Infrastrukturës, Jeton Raka, ministren e Ekonomisë Artane Rizavanollin, deputetë të Kuvendit të Kosovës dhe drejtorë e zyrtarë komunalë.
Po ashtu kanë vizituar edhe kompleksin e banesave sociale në Gjilan, ku po vazhdon renovimi i tërësishëm: izolimi i plotë i kulmit, fasada e jashtme e gjithë objektit, ku dhe janë ndërruar edhe dritaret.
Kryetari i Komunës së Gjilanit, Alban Hyseni, tha se Komuna e Gjilanit, është një nga komunat që ka arritur të plotësojë kërkesat për këtë projekt jetik dhe shumë të rëndësishëm për qytetarët”, tha Alban Hyseni.
Sipas tij po fillon implementimi i projektit dhe po punohet shumë për mirëqenien e qytetarëve.
I pari i Gjilanit, falënderoi kryeministrin Albin Kurtin zv. ministrin e Mjedisit Jeton Rakën, deputetë dhe të gjithë të tjerët që kanë kontribuar në këtë projekt të rëndësishëm.
Kryeministri Albin Kurti, tha se vendosen gur themelin e ndërtesave për banimin e përballueshëm dhe social në Gjilan. Bëhet fjalë për dy lote, ku do të ndërtohen gjithsej 71 njësi banimi për 71 familje, prej të cilave 57 do të jenë për banim të përballueshëm dhe 14 për banim social.
Sipërfaqja e përgjithshme ndërtimore do të jetë 12 mijë 350 metra katrorë dhe objekti do të përfshijë katër tipe të ndryshme banesash: me sipërfaqe prej 53, 66, 77 dhe 87 metrash katrorë.
Kohëzgjatja e kontratës së ndërtimit është paraparë të jetë 3 vjet. Më shpejt bënë e më ngadalë nuk bënë.
“Qysh në fillim të mandatit patëm filluar me përgatitjet për banimin e përballueshëm social duke vendosur në agjendë qeveritare për komunat që kanë aplikuar dhe këtu në Gjilan po e kurorëzojmë themelin,” deklaroi Kurti.
Kurti theksoi se përfitues nga ky projekt do të jenë çiftet e reja që ende nuk e kanë të zgjidhur problemin e banesës – me kusht që njëri nga partnerët të jetë nën moshën 37 vjeç – si dhe familjet me prindërit vetushqyes.
Ky është një projekt i bashkë financuar mes komunës dhe ministrisë, ku Komuna e Gjilanit kontribuon me lokacionin dhe ndërtimin e infrastrukturës përcjellëse.
Komuna e Gjilanit është njëra ndër pesë komunat për të cilat janë hartuar projektet ideore dhe kryesore për banimin e përballueshëm dhe social.
Nga ana tjetër, zëvendësministri Jeton Raka tha se ky projekt ka për synim të mundësojë një jetë më të denjë dhe më të përballueshme për të gjithë qytetarët.
“Qeveria në vitin 2021 ka miratuar Agjendën Qeveritare për Banim të Përballueshëm dhe Social, ku kemi bërë edhe thirrje publike për komunat,” tha ai, duke shtuar se kësaj thirrjeje i janë përgjigjur vetëm 13 nga gjithsej 38 komuna të vendit”, tha zv.ministri.
Projekti është bashkëfinancim me Komunën e Gjilanit./GJILANI INFO/
