Sot u shënua një moment i rëndësishëm me vendosjen e gurthemelit të objektit të ri për Shërbimin e Pediatrisë në Spitalin e Përgjithshëm të Gjilanit, një investim me rëndësi të veçantë për përmirësimin e kujdesit shëndetësor ndaj fëmijëve dhe krijimin e kushteve më moderne për trajtim dhe shërbime mjekësore.
I pranishëm në ceremoninë e vendosjes së gurthemelit ishte edhe Kryeministri në detyrë i Republikës së Kosovës, z.Albin Kurti, i cili theksoi se ndihet i gëzuar që gjendet në mesin tuaj për një rast kaq të rëndësishëm për shëndetësinë publike, në veçanti për atë të Gjilanit, duke ndarë këtë moment që paraqet një zotim për shëndetësinë në Gjilan dhe Anamoravë, në mënyrë që të krijohen objekte moderne dhe kushte më të mira për pacientët dhe stafin. Ky rast është dyfish më i rëndësishëm, sepse bëhet fjalë për Pediatrinë, ku fëmijët do të marrin shërbimet e nevojshme. Llogarisni në ne, sepse Qeveria do të jetë gjithmonë pranë jush.
Ministri i Shëndetësisë, Arben Vitia, theksoi se projekte si ky i Pediatrisë do të vazhdojnë edhe në institucione të tjera shëndetësore, duke kontribuar vazhdimisht në ofrimin e shërbimeve sa më cilësore për pacientët tanë.
Drejtori i SHSKUK-së, z.Elvir Azizi, theksoi se ka pasur një bashkëpunim shumë të mirë me Drejtorin e SPGJ-së, Dr. Afrim Cana, ku së bashku kanë marrë iniciativën për ndërtimin e objektit të ri të Pediatrisë, projekt ky me rëndësi të veçantë për avancimin e shërbimeve shëndetësore për fëmijët dhe përmirësimin e kushteve të trajtimit dhe kujdesit mjekësor. Ai vlerësoi angazhimin dhe bashkëpunimin institucional, duke theksuar se ky investim do të krijojë kushte moderne dhe më funksionale për pacientët dhe stafin shëndetësor.
Drejtori i Spitalit të Përgjithshëm Gjilan, Dr. Afrim Cana, theksoi se ky projekt paraqet një hap të madh drejt avancimit të sistemit shëndetësor, duke synuar ofrimin e ambienteve bashkëkohore, më të sigurta dhe më funksionale për fëmijët dhe stafin shëndetësor. Objekti i ri do të jetë i pajisur me infrastrukturë moderne dhe hapësira të përshtatshme për diagnostikim, trajtim dhe kujdes profesional, duke synuar edhe zgjerimin e gamës së shërbimeve për këtë kategori. Ai vlerësoi lart angazhimin dhe bashkëpunimin me SHSKUK-në dhe Ministrinë e Shëndetësisë.
Në ceremoninë e vendosjes së gurthemelit morën pjesë përfaqësues institucionalë, drejtues të institucioneve shëndetësore, profesionistë shëndetësorë dhe mysafirë të shumtë, të cilët vlerësuan rëndësinë e këtij investimi për të ardhmen e shëndetit të fëmijëve dhe për zhvillimin e shërbimeve spitalore.
Udhëheqësi i Shërbimit të Pediatrisë, Dr. Sadik Rashiti, tha se me vendosjen e këtij gurthemeli fillon një kapitull i ri për Shërbimin e Pediatrisë, me synimin që fëmijët të marrin kujdesin më të mirë të mundshëm në ambiente moderne dhe dinjitoze.
Ky investim madhor, me vlerë prej 996,687.37 euro, është inicuar nga Shërbimi Spitalor Klinik dhe Universitar i Kosovës.
Objekti do të ndërtohet në një hapësirë mbi 1000 m² dhe do të përfshijë të gjitha kushtet e nevojshme për ofrimin cilësor të shërbimeve shëndetësore./Gjilani INFO/
