Kampioni evropian i boksit në grupmoshën e kadetëve, greku Vasilieos Topalos, ka humbur jetën në moshën 16-vjeçare, si pasojë e lëndimeve që kishte marrë gjatë një seance stërvitore para disa ditëve, raporton “Proto Thema”.
Topalos kishte marrë lëndime serioze në seancë sparingu në mëngjesin e 16 dhjetorit. Ai në javët e fundit ishte i hospitalizuar në spitalin Tzanios.
Federata e Boksit të Greqisë në anën tjetër ka thënë se do të bëhen hetime ndaj të gjithëve që ishin të përfshirë në këtë situatë.
Sipas pronarit të palestrës, Nikos Yidakos, goditja ishte vërejtur edhe nga ekzaminimet.
Ngjarjen së pari e kishte vërejtur boksieri tjetër Alik Lagazashvili, që kishte dëgjuar zhurmën. Ai shkoi për të parë se çfarë ndodhi. Menjëherë u informuan babai i Topalosit dhe pronari i palestrës.
Ai ishte dërguar në spital, mjekët e kishin operuar në kokë, për të larguar hematomën. Por, Topalos nuk arriti t’i mbijetonte plagëve.
Topalos në tetor të vitit të kaluar në Itali, fitoi medaljen e artë evropiane për kadet, në kategorinë e lehtë, deri 60 kilogramë.
