Të nderuar kolegë, drejtues të institucioneve arsimore dhe të dashur nxënës,
Po e nisim edhe një vit të ri shkollor, të motivuar dhe besimplotë për suksese të reja, gjithnjë të përkushtuar dhe të vetëdijshëm për misionin tonë të rëndësishëm arsimor, edukativ dhe zhvillimor për arsimin e sotëm dhe të ardhmen e vendit tonë.
Si DKA, së bashku me drejtuesit e shkollave, me të gjitha kapacitetet që disponojmë, kemi bërë përgatitjet e nevojshme për një fillim të mbarë dhe shpresëdhënës të vitit të ri shkollor.
Në ditën e parë të mësimit, t’ia kujtojmë secili vetes misionin e rëndësishëm që kemi dhe t’i presim fëmijët e të rinjtë tanë me gëzim, shpresë dhe besim në punën tonë, në suksesin e tyre dhe në suksesin tonë të përbashkët.
Të jemi të gatshëm për suksese dhe t’i përballojmë me vendosmëri sfidat që do të na dalin përpara. Të gjithë ne dimë, mundemi dhe do t’ia dalim patjetër!
Urime dhe gëzuar, të dashur nxënës! Ecni të sigurt dhe me shëndet drejt sukseseve.
Urime të veçanta për nxënësit që sot, për herë të parë, ulen në bankat shkollore. Uroj që kjo ditë të jetë fillimi i një rrugëtimi të bukur, të mbushur me dije, miqësi dhe suksese.
Të nderuar kolegë, urime viti i ri shkollor! Qofshi me shëndet të mirë dhe dalshim faqebardhë në misionin tonë të përbashkët, thuhet në postimin e drejtorit të Drejtorisë së Arsimit në Gjilan,Jeton Rexhepi./Gjilani INFO/
