Universiteti Publik “Kadri Zeka” dhe Komuna e Gjilanit kanë nënshkruar një marrëveshje bashkëpunimi me qëllim forcimin e zhvillimit akademik dhe shkencor, si dhe përmirësimin e kushteve për mësim dhe hulumtim.
Kjo marrëveshje mundëson qasje në burime të shumta shkencore dhe profesionale për studentët dhe stafin akademik të universitetit. Në kuadër të saj, parashihet edhe përdorimi i pajisjeve elektronike të pajisura me aplikacione të avancuara, të cilat ofrojnë qasje në databaza ndërkombëtare me mbi 30 milion burime elektronike.
Në prani të kryetarit të Komunës së Gjilanit, Alban Hyseni, marrëveshja u nënshkrua nga drejtori i Drejtorisë për Kulturë Rini e Sport, Kushtrim Zeqiri dhe dekani i Fakultetit të Shkencave Sociale, Prof. Asoc. Dr. Selim Daku. Në këtë ceremoni morën pjesë edhe Prodekani i Fakultetit të Shkencave Sociale, Prof. Ass. Dr. Blerim Haziri, si dhe Udhëheqësja e Bibliotekës së UKZ-së, Labinota Ramadani.
Dekani i Fakultetit të Shkencave Sociale, Prof. Asoc. Dr. Selim Daku, falënderoi kryetarin Alban Hyseni dhe drejtorin Kushtrim Zeqiri për gatishmërinë dhe mbështetjen e ofruar, duke theksuar se kjo marrëveshje u mundëson studentëve dhe stafit të përfitojnë nga databaza ndërkombëtare me mbi 30 milion burime nga fusha të ndryshme shkencore dhe profesionale.
Dekani Daku gjithashtu shprehu mirënjohje në emër të rektorit të UKZ-së, Prof. Asoc. Dr. Artan Dërmaku, duke nënvizuar rëndësinë e kësaj marrëveshjeje për zhvillimin e universitetit.
Nga ana e tij, kryetari Alban Hyseni, theksoi se Komuna e Gjilanit mbetet e përkushtuar për të mbështetur Universitetin Publik “Kadri Zeka”, duke vënë në dispozicion të gjitha asetet në funksion të përmirësimit të punës së studentëve dhe stafit akademik. Ai theksoi rëndësinë e këtij bashkëpunimi në rritjen e cilësisë së studimeve dhe avancimin e veprimtarisë kërkimore-shkencore, duke shtuar se bashkëpunime të tilla do të vazhdojnë edhe në të ardhmen.
Në kuadër të kësaj marrëveshjeje, shfrytëzimi i pajisjeve dhe fondit të burimeve do të shërbejë si një mbështetje konkrete për procesin mësimor dhe kërkimor, si dhe si një element i rëndësishëm për proceset e akreditimit dhe riakreditimit të programeve të studimit./Gjilani INFO/
