Në kuadër të projektit EDUFAIR – “Advancing Quality Higher Education in Western Balkans through Facilitating AI Integration in Teaching, Learning and Research” (ERASMUS-EDU-2024-CBHE-STRAND-1, Project No. 101175331), Universiteti Publik “Kadri Zeka” ka përfunduar me sukses hartimin e Udhëzuesit Praktik për Përdorimin Etik të Inteligjencës Artificiale (AI) në proceset mësimore, kërkimore dhe administrative.
Ky dokument strategjik është rezultat i punës së përkushtuar të komisionit të formuar me vendim të Rektorit, Prof. Asoc. Dr. Artan Dërmaku, dhe të udhëhequr nga Prorektori për Bashkëpunim Ndërkombëtar dhe Projekte, Prof. Dr. Dukagjin Leka, i cili është edhe Menaxher i Projektit EDUFAIR në UKZ, ku në përbërjen e grupit punues janë përfshirë përfaqësues nga njësitë akademike dhe administrative të universitetit.
Procesi i hartimit të këtij udhëzuesi është mbështetur nga menaxhmenti i lartë i UKZ-së dhe është zhvilluar në bashkëpunim të ngushtë me SCiDEV dhe partnerët e tjerë të projektit. Grupi punues ka përfituar nga vizitat studimore në Universitetin e Salentos (Itali) dhe ULSIT (Bullgari), si dhe nga workshop-e dhe konsultime ndërkombëtare, përfshirë punëtorinë “Impact of AI in the Academy” të mbajtur në Tiranë.
Ky dokument përfaqëson një hap të rëndësishëm drejt ndërtimit të një kornize institucionale për përdorimin etik dhe të përgjegjshëm të Inteligjencës Artificiale në arsimin e lartë. Udhëzuesi do të ndihmojë stafin akademik dhe studentët në kuptimin, zbatimin dhe zhvillimin e praktikave të sigurta, transparente dhe inovative të përdorimit të AI-së në mësimdhënie dhe kërkim.
Aktualisht, dokumenti është dorëzuar tek menagjmenti i UKZ dhe më pas për miratim nga Senati i UKZ-së, dhe pas aprovimit do të zbatohet si udhëzues zyrtar për gjithë komunitetin universitar, duke u bërë pjesë e platformës institucionale për zhvillimin digjital dhe inovacionin akademik.
Ky rezultat dëshmon për përkushtimin e Universitetit Publik “Kadri Zeka” në avancimin e cilësisë së arsimit të lartë dhe integrimin e teknologjive bashkëkohore në mënyrë të përgjegjshme, në përputhje me vlerat dhe strategjinë zhvillimore të UKZ-së./Gjilani INFO/
