Në fshatin Drobesh të komunës së Vitisë, është përuruar sot çerdhja publike për fëmijë. Me këtë rast, komuna e Vitisë është bërë me çerdhen e tretë publike pas asaj në Viti dhe Çifllakë.
Në ceremoninë e përurimit dhe prerjes së shiritit mori pjesë kryetari i komunës, Sokol Haliti, i shoqëruar nga drejtoresha e Arsimit, Arta Ajeti.
Kryetari Haliti uroi banorët e Drobeshit dhe të fshatrave përreth për hapjen e kësaj çerdheje, duke theksuar rëndësinë që ka edukimi i hershëm dhe përkujdesja për fëmijët.
“Kjo është çerdhja e tretë publike në territorin e komunës sonë. Do të hapim shumë më shumë se një çerdhe sepse kemi obligim për përmirësimin e kushteve dhe krijimin e hapësirave shkollore sikurse edhe të çerdheve për filizat e rinj,” tha kryetari Haliti, duke falënderuar Këshillin e fshatit, asamblistët nga ky fshat, si dhe Ministrinë e Arsimit për realizimin e këtij projekti. Ai shtoi se arsimi parafillor mbetet një ndër prioritetet kryesore të qeverisjes lokale.
Kurse drejtoresha e Arsimit, Arta Ajeti, tha se investimi në këtë objekt është një hap i rëndësishëm drejt përmirësimit të kushteve për edukimin e hershëm. “Kjo çerdhe do të krijojë mundësi më të mira për fëmijët dhe do të lehtësojë prindërit e kësaj zone,” u shpreh ajo.
Ndërkaq, drejtoresha e çerdhes “Gëzimi Ynë”, Mirlinda Sylejmani-Zuka, tha se është e lumtur që ishte e pranishme në hapjen e kësaj çerdheje, duke falënderuar kryetarin Haliti, drejtoreshën Ajeti dhe të gjithë ata që kontribuuan në realizimin e projektit. Ajo shtoi se kjo çerdhe do të ofrojë kushte të mira për fëmijët, staf të përkushtuar dhe programe të përshtatura për zhvillimin e tyre.
Përndryshe, çerdhja në Drobesh do të shërbejë për fëmijët e këtij fshati dhe të zonave përreth dhe është mirëpritur nga qytetarët vitias./GJILANI INFO/
